Օլիմպիական եռակի չեմպիոն (1956 թ. Մելբուռն ՝ օղակների վրա ու թիմային պայքարում, 1960 թվականի Հռոմ՝ օղակների վրա), 1960-ի խաղերի արծաթե մեդալակիր, Աշխարհի քառակի, Եվրոպայի կրկնակի ու ԽՍՀՄ 11-ակի չեմպիոն Ալբերտ Ազարյանը փետրվարի 11-ին նշում է ծննդյան 94-ամյակը:
Հայաստանի մարզական լրագրողների կողմից 20-րդ դարի հայ լավագույն մարզիկ ճանաչված Ազարյանը շարունակում է ապրել Երեւանում, այցելել իր անվան մարզադպրոց, վերջերս էլ ներկա է եղել իրեն նվիրված արձանի բացմանը:
Կնոջ ու դստեր մահն անհետեւանք չեն մնացել Օլիմպիական չեմպիոնի համար, սակայն նա շարունակում է պահել ոգու արիությունն ու մարզական բնավորությունը:
Ազարյանի տարեդարձի նախօրեին հավաքել ենք նրա կյանքի ու կարիերայի ուշագրավ կադրերն եւ հիշել մի այսպիսի պատմություն:
Լուսանկարը` Հայաստանի մարմնամարզության ֆեդերացիայի
Հռոմի խաղերին Ազարյանը կարող էր եւ չմասնակցել: Նա անհաջող է իրեն դրսեւորել Սուխումում կայացած որակավորման մրցումներում, եւ մարզիչները որոշել էին, որ նման ցուցանիշներով Հռոմում անելիք չունի: Այդ փաստը զայրացրել էր մարզիկին, նա մեկ օրվա ընթացքում կարողացավ շտկել վարժությունն ու տքնաջան աշխատանքով ապահովեց տեղը ԽՍՀՄ-ի հավաքականում:
Մարմնամարզության սիրահարներն այն տարիներին բավական տեղեկացված էին Ազարյանական խաչի մասին, եւ որտեղ էլ նա ելույթ ունենար, ցանկանում էին անձամբ տեսնել վարժությունը: Այդպիսի ոգեւորված բազմություն էր հավաքվել նաեւ Հռոմի Օլիմպիական խաղերի ժամանակ, որտեղ Ազարյանը բավական հեշտ ոսկե մեդալ նվաճեց եւ արժանացավ ոգեւորված բացականչությունների:
Նախկինում մամուլում խաչի մասին այնքան տպավորիչ հրապարակումներ էին եղել, որ որեւէ մեկի մոտ կասկած չկար՝ Հռոմում Ազարյանի ելույթը սպորտի ամենագեղեցիկ դրվագներից է լինելու: Հայ մարզիկը հուսախաբ չարեց իր համար մարզապալատ եկածների, որոնց մեծ մասն իտալացիներ էին:
Լուսանկարը` Getty Images
Ազարյանն իսկական շոու կազմակերպեց՝ կախված լինելով օղակներից, թեթեւությամբ ճախրեց օդում, հեշտությամբ կատարեց ձեռքով շարժումներն ու ստացավ իր հայտնի խաչը՝ պտտվելով աջ ու ձախ: Ողջ ընթացքն, իհարկե, ուղեկցվում էր մարմնամարզիկի գեղեցիկ ու նաեւ մի քիչ խորամանկ ժպիտով:
Երկրպագուներին չգոհացրին Ազարյանին տված միավորները՝ 10-ն առավելագույն սահմանն էր, համարում էին, որ նա շատ ավելիին է արժանի: Դա չտեսնված երեւույթ էր մարմնամարզության եւ սպորտի համար առհասարակ: Արդյունքի վրա այդ ամենը որեւէ կերպ չազդեց, բայց դրվագն ընդմիշտ մնաց սպորտի պատմության մեջ:
Լուսանկարը` Sputnik
Գուցե, նաեւ այդ ամենն է հաշվի առնում Ալբերտ Ազարյանը, երբ Հռոմում նվաճած իր մեդալն այդքան կարեւորում է:
«Ցավոք, հիմա այդ մեդալներից ոչ մեկը չունեմ: Հայաստանում ցուցահանդես պետք է լիներ, ես ու Հրանտ Շահինյանը մեր օլիմպիական մեդալները տրամադրեցինք, ու բոլորն էլ գողացան: Հրանտն ասում էր, որ մենք օլիմպիական չեմպիոններ ենք առանց մեդալների»,-տարիներ առաջ Mediamax Sport-ին ասել է Ազարյանը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: