ՀԱՕԿ-ը պարգեւատրել է ԱԱ-ում մեդալներ նվաճած մարզիկներին ու նրանց մարզիչներին

Հայաստանի ազգային Օլիմպիական կոմիտեն պարգեւատրել է 2025 թվականին Աշխարհի առաջնություններում մեդալներ նվաճած մարզիկներին ու հավաքականների գլխավոր մարզիչներին։

Այս տարի Աշխարհի չեմպիոնի կոչումը նվաճել են Մալխաս Ամոյանն ու Վարազդատ Լալայանը, ովքեր հավասարը չեն ունեցել նաեւ Եվրոպայի առաջնություններում։ Նրանք պարգեւատրվել են 10-ական մլն դրամով։ Հունահռոմեական ըմբշամարտի ու ծանրամարտի հավաքականների գլխավոր մարզիչներ Արմեն Բաբալարյանն ու Փաշիկ Ալավերդյանը ստացել են 5-ական մլն։

Աշխարհի փոխչեմպիոններ Արթուր Դավթյանը եւ Մամիկոն Խաչատրյանը, ովքեր ԵԱ-ում դարձել էին համապատասխանաբար չեմպիոն ու փոխչեմպիոն, արժանացել են 7-ական, մարմնամարզության հավաքականի գլխավոր մարզիչ Հակոբ Սերոբյանը՝ 4 մլն-ի։

ԱԱ-ում բրոնզե պարգեւներ նվաճած Հրաչյա Պողոսյանը, Սլավիկ Գալստյանը եւ Արսեն Հարությունյանը ստացել են 4 մլն դրամ։ Ազատ ոճի ըմբշամարտի թիմի գլխավոր մարզիչ Հաբեթնակ Կուրղինյանը պարգեւատրվել է 2 մլն-ով։