Ժաննա Անդրեասյանը հաստատել է Կարեն Գիլոյանի հրաժարականը

Այսօր ԿԳՄՍ նախարար Ժաննա Անդրեասյանը հանդես է եկել ասուլիսով, որտեղ ամփոփել է 2024 թվականի կատարած աշխատանքները։

Նա անդրադարձել է նաեւ սպորտի գծով նախարարի տեղակալ Կարեն Գիլոյանի հրաժարականին՝ հաստատելով լուրերը։

«Այո, նա դադարեցրել է իր աշխատանքը որպես սպորտի գծով տեղակալ։ Պատճառները տարբեր են։ Պարոն Գիլոյանը տարիների փորձառություն ունի, շատ կայացած է, շարունակելու է աշխատել սպորտի ոլորտում։ Կարծում եմ, որ նրա հետ համագործակցությունը կշարունակվի։ Փոփոխությունների փուլ է, նոր մոտեցմամբ կրկին լավ արդյունքներ կգրանցենք»,-ասել է Անդրեասյանը։

Նախարարն անդրադարձել է այն լուրերին, թե Գիլոյանի ու իր միջեւ վիճաբանություն է եղել, ինչից հետո էլ եղել է հրաժարականի դիմումը․ «Մեր հարաբերությունները չեն փոխվել։ Գործնական հարաբերությունների ընդհատումը պետք է տեղի ունենա այնպես, որ մարդկային շփումը հնարավոր լինի շարունակել։ Ես միշտ այդպես եմ հարաբերվում իմ գործընկերների հետ»։

Ավելի վաղ մեզ հայտնի էր դարձել, որ Գիլոյանը շարունակելու է գործունեություն ծավալել սպորտի ոլորտում, աշխատել միջազգային հակադոպինգային գործակալությունում։

Կարեն Գիլոյանը ԿԳՄՍ նախարարի տեղակալի պաշտոնում նշանակվել է 2020-ի դեկտեմբերի 30-ին։ Այս տարվա հոկտեմբերին նա հարցազրույց էր տվել Mediamax Sport-ին, որից պարզ էր դառնում, որ նա պատրաստվում էր պաշտոնավարել առնվազն մինչեւ 2028-ի Օլիմպիական խաղերի ավարտը։