Ռաֆայել Նադալը կարիերան ավարտեց երեկ, երբ Դեւիսի գավաթում Իսպանիայի հավաքականը պարտվեց Նիդերլանդներից ու դուրս մնաց հետագա պայքարից։
Այս լեգենդար մարզիկին հրաժեշտի խոսքեր հղեցին բազմաթիվ հայտնիներ, սակայն մենք ընտրել ենք նրա ամենամտերիմ ընկեր-մրցակից Ռոժեր Ֆեդերերի նամակը։ Շվեյցարացին այն գրել էր երեկ, երբ դեռ Նադալը չէր մեկնարկել Դեւիսի գավաթում։
Լուսանկարը` ATP
«Vamos, Ռաֆայել Նադալ։
Քանի որ դու ավարտում ես կարիերադ, որոշեցի նախքան հուզվելս մի քանի խոսք ասել։
Սկսենք ակնհայտից. դու ինձ շատ ես հաղթել: Ավելի շատ, քան՝ ես քեզ։
Դու ինձ այնպիսի մարտահրավեր ես նետել, ինչպիսին ոչ ոք չէր կարող։
Գրունտի վրա ելույթ ունենալու ժամանակ ինձ թվում էր, թե ես ոտք եմ դնում քո տարածք։ Եւ դու ինձ ստիպեցիր աշխատել ավելի շատ՝ չմտածելով միայն ունեցածս պահելու մասին։ Դու ստիպեցիր ինձ վերաիմաստավորել իմ խաղը։
Ես այնքան էլ սնահավատ մարդ չեմ, բայց դու ամեն ինչ անում էիր բոլորովին այլ մակարդակի վրա։ Քո կատարած ամբողջ գործընթացը: Այդ բոլոր ծեսերը՝ թե ինչպես էիր դասավորում ջրի շշերը, կարծես խաղալիք զինվորներ տեղավորեիր, մազերդ հարդարելը, ներքնազգեստդ կարգավորելը...
Լուսանկարը` ATP
Գաղտնի, բայց ես սիրում էի այդ ամենը: Որովհետեւ դա այնքան յուրահատուկ էր, ինչքան դու: Եւ գիտես ինչ, Ռաֆա, դու ինձ ստիպեցիր ավելի շատ հաճույք ստանալ խաղից։ Լավ, գուցե ոչ ամենասկզբում:
2004 թվականի Ավստրալիայի բաց առաջնությունից հետո ես առաջին անգամ դարձա ATP վարկանիշում առաջինը: Ինձ թվում էր, որ կանգնած եմ աշխարհի գագաթին: Եւ դա այդպես էր, մինչեւ անցավ երկու ամիս։ Դու Մայամիի կորտում էիր եւ կրում էիր քո կարմիր անթեւ շապիկը՝ ցուցադրելով ուժեղ մկաններդ, եւ դու այնքան համոզիչ կերպով հաղթեցիր ինձ։
Լուսանկարը` ATP
«Մալյորկայի զարմանահրաշ երիտասարդ խաղացող, տաղանդ, որը մի օր հաղթելու է խոշոր մրցաշարում»․․․ աղմուկ, որը ես լսում էի քո մասին, պարզապես միայն հիացմունք չէր։ Երկուսս էլ մեր ճանապարհորդության սկզբնամասում էինք։
Ռաֆա, 20 տարի անց ես պետք է ասեմ․ ինչ անհավանական թռիչք ես դու կատարել։ Ներառյալ Ֆրանսիայի բաց առաջնության 14 պատմական հաղթանակը։ Դու Իսպանիային հպարտություն պարգեւեցիր․․․ ողջ թենիսի աշխարհին պարգեւեցիր այն։
Միասին խթանել ենք սպորտի զարգացմանը: Խաղալով խոտի, գրունտի վրա, գրանցելով ամենամարդաշատ հանդիպման ռեկորդը, երբ ելույթ էինք ունենում Հարավային Աֆրիկայի Քեյփթաուն քաղաքում եւ մեզ հետեւում էին ավելի քան 50,000 երկրպագուներ։
Լուսանկարը` ATP
Միշտ բարկացրել ենք միմյանց, կորտում հարգել ենք ու երբեմն էլ պարգեւատրման արարողության ժամանակ բառացիորեն բռնել միմյանց գավաթները։
Մինչ այսօր էլ երախտապարտ եմ, որ ինձ 2016-ին հրավիրեցիր Մալյորկա՝ օգնելու Ռաֆա Նադալ ակադեմիայի բացմանը։ Իրականում, ես ինքս ինձ հրավիրեցի: Գիտեի, որ դու չափազանց քաղաքավարի ես ու չես պնդի, որ պարտադիր այնտեղ լինեմ։ Պարզապես չէի կարող այդ առիթը բաց թողնել։
Ամբողջ աշխարհի երեխաների համար դու միշտ օրինակ ես եղել։ Միրկան եւ ես այնքան ուրախ ենք, որ մեր երեխաները մարզվել են քո ակադեմիաներում: Նրանք ոգեւորված էին եւ շատ բան սովորեցին, ինչպես հազարավոր այլ երիտասարդներ: Չնայած ես անհանգստանում էի, որ իմ երեխաները կդառնան ձախլիկ թենիսիստներ։
Լուսանկարը` ATP
Եվ հետո եղավ Լոնդոնը՝ 2022 թվականի Լեյվերի գավաթը: Իմ վերջին հանդիպումը: Ինձ համար շատ բան էր նշանակում այն, որ դու իմ կողքին էիր, ոչ թե որպես մրցակից, այլ որպես զուգախաղում իմ խաղընկեր: Այդ գիշերը կորտը եւ արցունքները քեզ հետ կիսելը հավերժ կլինեն իմ կարիերայի ամենայուրահատուկ պահերից մեկը:
Ուզում եմ միայն շնորհավորել քո ընտանիքին եւ թիմին, նրանք բոլորն էլ մեծ դեր են ունեցել քո հաջողության մեջ: Իմացիր, որ քո վաղեմի ընկերը միշտ ուրախանում է քեզ համար եւ նույնկերպ կլինի միշտ՝ ինչին հասնես հաջորդ անգամ։
Լուսանկարը` ATP
Լավագույն մաղթանքներս, քո երկրպագու՝
Ռոժեր Ֆեդերեր»։
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: