Ռաֆայել Նադալի ու Լեո Մեսսիի անհատական ռեկորդային նվաճումները

Ռաֆայել Նադալը դարձել է 4-րդ թենիսիստը, որը տիրացել է 80 անհատական նվաճումների:

Տորոնտոյի Մասթերսի եզրափակչում նա 6:2, 7:6 (7:4) հաշվով ուժեղ է եղել հույն Ստեֆանոս Ցիցիպասից: Հանդիպումը տեւել է 1 ժամ 43 րոպե:

Նադալից շատ մրցանակներ ունեն Ջիմի Կոնորսը (109), Ռոջեր Ֆեդերերն (98) ու Իվան Լենդլը (94):

Իսկ Մասթերս շարքի մրցումներում դա առաջին ռակետի 33-րդ հաղթանակն էր, ինչը եւս ռեկորդային է համարվում:

Մյուս ռեկորդակիրը Լեո Մեսսին է: Նա «Բարսելոնայի» պատմության ամենատիտղոսակիր ֆուտբոլիստն է դարձել՝ շրջանցելով Անդրես Ինիեստային:

Իսպանիայի Սուպերգավաթի խաղում կատալոնական ակումբը 2:1 հաշվով հաղթել է «Սեւիլիային», Մեսսին իր 33-րդ գավաթին է տիրացել:

Արգենտինացին 9 անգամ Իսպանիայի չեմպիոն է դարձել, 6 անգամ՝ Գավաթի, 7՝ Սուպերգավաթի, Չեմպիոնների Լիգայում հաղթել է 4 անգամ, 3-ական ՈւԵՖԱ-ի սուպերգավաթի ու Աշխարհի ակումբային չեմպիոնի կոչմանն արժանացել: