Էլոդի Քլյուվել` ձիերից սարսափող աղջիկը

Շաբաթվա գեղեցկուհին

«Մեդիամաքս Սպորտը» ներկայացնում է «Շաբաթվա գեղեցկուհին» նոր շարքը, որի առաջին հերոսուհին ֆրանսուհի հնգամարտիկ Էլոդի Քլյուվելն է. հմուտ հեծյալ, արագ վազորդ, դիպուկ նետաձիգ, լավ լողորդ, ճկուն սուսերամարտիկ եւ պարզապես գեղեցկուհի:

Լողը հնգամարտով փոխարինած Քլյուվելը մարզական կարիերայի անցած 5 տարիների ընթացքում բազմաթիվ խոչընդոտների միջով է անցել: Ձիերից սարսափող աղջիկը տարիներ առաջ չէր էլ կարող պատկերացնել, որ մի օր ձիարշավների կմասնակցի ու հաղթանակներ կտոնի:

- Էլոդի, հնգամարտը սովորաբար չի ընդգրկվում այն մարզաձեւերի ցուցակում, որով պատանիները երազում են զբաղվել:



- Գիտեմ: Դա տեղի ունեցավ 2008-ին, թողել էի լողը ու ցանկանում էի որեւէ նոր բանով զբաղվել, հաղթահարել նոր խոչընդոտներ: Պատճառն այն էր, որ հնարավորություն չստացա Ֆրանսիայի լողի հավաքականի կազմում մասնակցել Պեկինի օլիմպիական խաղերին: Հնգամարտը կյանքումս ինչ-որ փոփոխություն մտցնելու լավ հնարավորություն էր: Հնգամարտում հայտնվելով` ես ոչ թե պարտություն կրեցի լողում, այլ մի նոր բանի սկիզբ դրեցի:

- Ո՞րն է հնգամարտի ամենաբարդ կողմը, որը դրանով չզբաղվող մարդը երբեք չի նկատի:

- Հնգամարտը հինգ տարբեր մարզաձեւերի ամբողջություն է: Այստեղ ամենակարեւորը հոգեբանական պայքարն է: Սա համարյա կատարյալ մարզաձեւ է, որը քեզ էլ է ստիպում իդեալական լինել ու իմանալ ամեն ինչ: Ձիավարության հատվածն ամենաբարդն է: Մենք մրցումներից առաջ չգիտենք, թե որ ձին է մեզ բաժին հասնելու, ու ամեն ինչ շատ անկանխատեսելի է: Հինգ մարզաձեւերից ամենաշատը սուսերամարտն եմ սիրում, քանի որ ես պայքարող մարդ եմ: 

- Կարիերայիդ ո՞ր ակնթարթը պատկերացնելիս ես ակամա ժպտում:



- Ընդամենը 5 տարի է, ինչ զբաղվում եմ հնգամարտով: Հիշարժան կարող եմ համարել այն պահը, երբ գրանցեցի իմ առաջին հաղթանակը Ռիոյում աշխարհի առաջնության ժամանակ: Նման պահ էր նաեւ, երբ ստացա Լոնդոնի օլիմպիական խաղերին մասնակցության իրավունք:

- Մրցումների ընթացքում հաստատ եղել են զվարճալի պահեր:

- Այո, երբ նոր էի սկսել զբաղվել հնգամարտով, զավեշտալի շատ բաներ էին կատարվում հետս: Օրինակ, մի անգամ ձիավարելիս հակառակ կողմով թռա արգելապատնեշի վրայով: Բոլորը ծիծաղում էին:

-Հետաքրքիր է,  ի՞նչ ծանրաբեռնվածություն է պահանջում հնգամարտը մարզիկից: 

- Ես մարզվում եմ շաբաթական 35 ժամ: Օրական զբաղվում եմ չորս-հինգ տարբեր սպորտաձեւերով: Առավոտյան` վազք, հրաձգություն եւ լող, իսկ կեսօրին՝ կամ սուսերամարտ կամ ձիավարություն: Պետք է պահպանեմ մարզավիճակս, ու դրա համար պայքարում եմ ամեն օր:



- Գիտեմ, որ հնգամարտից բացի եւս մեկ շատ կարեւոր մասնագիտություն ունես:

- Այո, ոստիկան եմ: Նաեւ թիկնապահի դասընթացների եմ գնացել: Հնգամարտը ֆինանսական առումով եկամտաբեր սպորտաձեւ չէ: Ոստիկանի աշխատանքն է ինձ օգնում գումար վաստակել:

- Առաջիկա պլանները սահմանափակվում են հնգամարտո ՞վ, թե՞...

- Դեռ որոշ ժամանակ ցանկանում եմ զբաղվել հնգամարտով: Բայց իմ երազանքն է ֆիլմերում, հատկապես՝ կատակերգություններում դեր ստանալը:

- Էլոդի, հեղինակավոր մարզական մի շարք կայքեր քեզ անվանել են Լոնդոն 2012-ի ամենահմայիչ մարզուհիներից մեկը: Ո՞րն է Էլոդի Քլյուվելի գեղեցկության գաղտնիքը:

- Ես սիրում եմ բնական ու անկեղծ լինել: Այնպիսին եմ, ինչպիսին կամ: Ամեն դեպքում, հաճելի է ընդգրկվել այդ ցուցակում:



- Ի՞նչ տեղեկություններ ունես հայկական սպորտի ու հայ մարզիկների մասին:

- Իմ հայ ընկերներից է Գոռ Հարությունյանը, նա խառը մարտարվեստներով է զբաղվում այստեղ` Ֆրանսիայում: Գիտեմ նաեւ նրա եղբորը: Ընդհանրապես, հայերը շատ ուժեղ են ըմբշամարտում: Հուսով եմ, որ այս հարցազրույցը կնպաստի, որպեսզի Հայաստանում հնգամարտով ավելի շատ հետաքրքրվեն:

Էլոդի Քլյուվելի հետ զրուցել է Նարինե Դանեղյանը: