Ինձագին մեկնում է Սաուդյան Արաբիա. Նա հրաժեշտ է թվել թիմին ու երկրպագուներին

Սիմոնե Ինձագին 4 տարի «Ինտեր»-ը մարզելուց հետո հեռանում է Սաուդյան Արաբիա:

Նա միլանյան ակումբը գլխավորել է 2021 թվականին՝ փոխարինելով Անտոնիո Կոնտեին: Ակումբում անցկացրած 4 տարիների ընթացքում Ինձագիի գլխավորությամբ թիմը 6 տիտղոսի է տիրացել (Իտալիայի չեմպիոն է հռչակվել, 2 Գավաթ եւ 3 Սուպերգավաթ նվաճել) եւ 2 անգամ դուրս եկել Չեմպիոնների Լիգայի եզրափակիչ: 

«Ալ Հիլալ»-ում Ինձագին 3 տարվա ընթացքում 75 մլն եվրո է ստանալու:

«4 տարվա ճանապարհորդությունից հետո, որի ընթացքում ամեն ինչ եմ տվել, եկել է հրաժեշտ տալու ժամանակը:

Ամեն օր առաջին ու վերջին միտքս «Ինտեր»-ի մասին է եղել: Խաղացողները, մարզիչներն ու ակումբի ցանկացած աշխատակից ինձ պատասխանում էին նույն պրոֆեսիոնալիզմով: Մեր նվաճած 6 տիտղոսներն ու ՉԼ-ում ունեցած հաջողությունները վկայում են այն մասին, որ ողջ թիմով հիանալի աշխատանք ենք կատարել:

Շնորհակալ եմ վստահության ու ակումբի ղեկավարության կողմից ամենօրյա զրույցների համար: Այսօր շատ դժվար է ինձ համար, բայց ցանկանում եմ եւս մեկ անգամ ամեն ինչի համար շնորհակալություն հայտնել: 

Ուզում եմ վերջին խոսքերս ուղղել «Ինտեր»-ի միլիոնավոր երկրպագուներին, որոնք աջակցում էին ինձ, դժվար պահերին արտասվում ու տանջվում  ինձ հետ, ուրախանում ու տոնում մեր նվաճած տիտղոսների առիթով: 

Երբեք ձեզ չեմ մոռանա: Առա՛ջ, «Ինտեր»»,- իր հրաժեշտի խոսքում նշել է մարզիչը:

Նշվում է, որ Սիմոնե Ինձագին հանգստյան օրերին մեկնելու է Ֆլորիդա, որտեղ «Ալ Հիլալ»-ը մասնակցելու է Աշխարհի ակումբային առաջնությանը: Նոր գլխավոր մարզչի առաջին հանդիպումը հունիսի 18-ին լինելու է Մադրիդի «Ռեալ»-ի դեմ:

«Ինտեր»-ի առաջնային խնդիրը հնարավորինս կարճ ժամանակում նոր գլխավոր մարզիչ գտնելն է, քանի որ այն նույնպես մասնակցելու է ԱԱ-ին: Թեկնածուների թվում նշվում են Սեսկ Ֆաբրեգասն ու Ռոբերտո Դե Դզերբին: