Մյունխենում ՊՍԺ-ի ու «Ինտեր»-ի միջեւ կայացած Չեմպիոնների Լիգայի եզրափակիչը Հայաստանում մեծ հետաքրքրություն էր առաջացրել, եւ պատճառն իհարկե Հենրիխ Մխիթարյանն էր։
Նա դարձավ մրցաշարի եզրափակչում երկու անգամ մասնակցած առաջին հայ ֆուտբոլիստը, բայց ի տարբերություն ստամբուլյան հանդիպման՝ «Ինտեր»-ի հիմնական կազմում էր։ Ցավոք, այս անգամ էլ Մխիթարյանին չհաջողվեց Եվրոպայի ու Կոնֆերենցիաների Լիգայում տարած հաղթանակներին ավելացնել նաեւ ՉԼ-ինը։
Լուսանկարը` PSG
Հանդիպման մեկնարկում թիմերը հնարավորինս զգուշավոր էին խաղում, բայց առաջին համարով գործում էր ֆրանսիական ակումբը, որը տիրում էր գնդակին ու ավելի շատ գրոհում։
ՊՍԺ-ի բազմաթիվ հարվածներն իրենց արդյունքը տվեցին 12-րդ րոպեին, երբ Աշրաֆ Հաքիմին գրավեց Յան Զոմերի դարպասը։ Առաջին գոլից ուշքի չեկած՝ «Ինտեր»-ն ընդունեց նաեւ երկրորդը՝ այն հեղինակեց Դեսիրե Դուեն։
Լուսանկարը` PSG
Երկրորդ կեսում «Ինտեր»-ի խաղն առանձնապես չփոխվեց, թիմի մոտ համարյա ոչինչ չէր ստացվում, դրան գումարած էլ իր պահվածքի համար դեղին քարտ ստացավ Սիմոնե Ինձագին։
63-րդ րոպեին Դուեն դուբլ ձեւակերպեց ու տեսականորեն ապահովեց ՊՍԺ-ի հաղթանակը։ Սյդ ժամանակ Մխիթարյանն արդեն փոխարինվել էր, ու «Ինտեր»-ի խաղն ավելի քաոսային էր դարձել։ Բայց ՊՍԺ-ն դրանով չբավարարվեց ու իսկական գոլառատ եզրափակիչ ապահովեց՝ գնդակներ խփեցին նաեւ Խվիչա Կվարացխելիան ու Սեննի Մայուլուն։
Լուսանկարը` PSG
ՊՍԺ-ն հաղթեց 5:0 հաշվով ու Լուիս Էնրիկեի գլխավորությամբ առաջին անգամ նվաճեց Չեմպիոնների Լիգայի Գավաթը։
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: