Գարիկ Կարապետյանը Գրան Պրիում նվաճել է բրոնզե մեդալ

Դոհայում ընթացող ծանրամարտի Գրան Պրիում երեկ հանդես են եկել մինչեւ 102 կգ մարզիկները։

Հայաստանն ունեցել է երկու ներկայացուցիչ՝ Սամվել Գասպարյանն ու Գարիկ Կարապետյանը։ Գասպարյանը հայտավորված է եղել, սակայն պայքարի մեջ չի մտել։

Կարապետյանը, որը մի քանի շաբաթ առաջ դարձել էր երիտասարդների ԱԱ-ի ոսկե մեդալակիր, այս անգամ գրավել է 3-րդ տեղը։ Նա պոկում վարժությունում բարձրացրել է 180 կգ, հրումում՝ 211 կգ ծանրաձող։ Երկամարտի 391 կգ արդյունքով Կարապետյանը դարձել է բրոնզե մեդալակիր։

Գրան Պրիի հաղթողի կոչումը նվաճել է Իբրահիմ Ֆարեզ Էլբախը (Կատար)՝ 400 կգ։

Այսօր հանդես կգան Տաթեւ Հակոբյանը ու Հռիփսիմե Խուրշուդյանը (87 կգ)։ Իսկ ավելի վաղ Հայաստանի հավաքականից բրոնզե մեդալակիր էր դարձել Ալեքսանդրա Գրիգորյանը, արծաթե՝ Դավիթ Հովհաննիսյանը։