Ալեքս Ռոկա Կամպիլիոն հաշմանդամություն ունեցող առաջին մարդն է, որը դարձել է մարաթոնյան վազքի հաղթող:
Նա մինչ այսօր էլ չի հավատում, որ Բարսելոնայի մարաթոնում հենց ինքն է կարողացել առաջին հատել եզրագիծը:
«Զգացմունքներս արտահայտելու համար խոսքեր չունեմ: Հիշում եմ այն ամիսները, երբ անընդհատ մարզվում ու աշխատում էի: Վազքի վերջնամասում նայեցի մարմնիս, տեսա թերություններս ու հասկացա, որ դժվար է լինելու: Չնայած այդ ամենին՝ ուժ գտա ու պայքարեցի մինչեւ վերջ: Այդ պահին ամենաերջանիկը ես էի»:
¡HE HECHO HISTORIA!
— Alex Roca Campillo (@alexroca91) March 19, 2023
Primera persona del MUNDO con un 76% de discapacidad que ha logrado terminar una MARATÓN: 42, 195 Km
Esto ha sido posible gracias a TODO mi equipo. Gracias a TODOS los que habéis estado animando, NO TENGO PALABRAS… pic.twitter.com/XjnQtDmKFN
Վեց ամսականում վարակվելով վիրուսային հիվանդությամբ՝ Ռոկան ձեռք է բերել ուղեղային կաթված: Դրանից հետո երեխայի մոտ նվազել է մարմնի ձախ կողմի շարժունակությունը: 31-ամյա Ռոկան հաղորդակցվում է ժեստերով, բայց հաշմանդամությունը երբեք չի կանգնեցրել նրան եւ մանկուց ֆուտբոլ է պարապել, իսկ վերջերս սկսել է զբաղվել լեռնահեծանվային սպորտով ու վազքով:
Լուսանկարը` Ռոկայի Թվիթերից
«Երեխա ժամանակից սկսած չէի դադարում երազել: Երբ ավարտեցի վազքը, հիշեցի պապիկիս, ով ինձ ցույց էր տալիս, թե ինչպես պետք է քայլել: Ինչպես նաեւ բժիշկներիս, ովքեր նշում էին, թե երբեք չեմ կարողանալու նույնիսկ քայլել: Եթե չորս տարի առաջ ինչ-որ մեկն ինձ ասեր, թե նման հաջողության եմ հասնելու, հաստատ չէի հավատա»:
Բարսելոնայի մարաթոնին պատրաստվելու համար նա պարապել է մեկ տարի, իսկ վերջին վեց ամսում անցել ինտենսիվ մարզումների՝ աշխատելով մարզչի ու ֆիզիոթերապեւտի հետ:
«Ես պատրաստվել եմ նաեւ հոգեբանորեն, քանի որ սա շատ կարեւոր է: Մարաթոնի համար անհրաժեշտ է մեծ մոտիվացիա եւ մտավոր ուժ: Վազքը նման է իմ կյանքին՝ դժվար է, հոգնեցնող, սակայն նպատակով լեցուն: Ընկնում եմ, բայց ոտքի եմ կանգնում, վազքը լցնում է մարդու միտքը եւ այն կապում մարմնի հետ, օգնում հասնել նպատակակետին»:
Լուսանկարը` Ռոկայի Թվիթերից
Ռոկայի համար սպորտն աշխարհի հետ հաղորդակցվելու միջոց է, դրա շնորհիվ նա իրեն լիարժեք է զգում ու չի նկատում այն դժվարությունները, որոնք հաղթահարում է ամեն օր:
«Ես խոսում եմ ժեստերի լեզվով, իսկ շատ մարդիկ չեն կարողանում ինձ հասկանալ: Օգնության է հասնում սպորտը, որի միջոցով ես շփվում եմ ուրիշների հետ: Սպորտը նաեւ տոկունություն է, կարգապահություն, թիմային աշխատանք»:
Բացի Բարսելոնայի մարաթոնից, նա մասնակցել է նաեւ վեց կիսամարաթոնի, հինգ եռամարտի, հեծանվամրցույթի:
Լուսանկարը` Ռոկայի Թվիթերից
«Վազում եմ, որովհետեւ հաճույք եմ ստանում դրանից: Նաեւ ուղերձ եմ հղում աշխարհին, որ բոլորս կարող ենք մեծ հաջողությունների հասնել՝ նույնիսկ ֆիզիկական սահմանափակումներ ունենալով: Եթե ունես կամքի ուժ եւ տոկունություն, կարող ես շատ բանի հասնել»։
Նա շնորհավորական նամակներ է ստացել բազմաթիվ հայտնիներից, այդ թվում իր հայրենակից ու սիրելի թենիսիստ Կառլոս Ալկարասից, երաժիշտ Ալեխանդրո Սանսից: Իսպանիայի ֆուտբոլի գավաթի «Բարսելոնա»-«Ռեալ» խաղի ժամանակ էլ կատարել է առաջին խորհրդանշական հարվածը:
¡SAQUE DE HONOR en el clásico Barça-Madrid!
— Alex Roca Campillo (@alexroca91) April 6, 2023
Esto es más que un sueño, esto es indescriptible. Siento tanta felicidad que no tengo suficientes palabras para agradecer lo que sucedió ayer.
Gracias por confiar en mí, gracias por hacerme feliz y gracias por ser: más que un club. pic.twitter.com/AvUf2qtAg5
Ռոկան ապրում է Բարսելոնայում իր կնոջ՝ սոցիալական աշխատող Մարիի հետ: Բացի «սպորտ»-ից, նա ունի եւս մեկ այլ սիրելի բառ՝ «ոչ»-ը:
«Երբ ինչ-որ մեկն ինձ ասում է «ոչ», ես նրանց ապացուցում եմ, որ այն դարձնելու եմ «այո»: Ամեն դեպքում, փորձում եմ այդպես անել: Ժամանակին ինձ շատերն են ասել, որ չեմ կարողանա քայլել, սովորել, ընկերներ կամ զուգընկեր ունենալ: Այսօր ցույց եմ տվել, որ նրանք սխալվել են, ես վերափոխվել եմ ու այդ բոլոր «ոչ»-երը փոխել «այո»-ի»:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: