Բասկետբոլային տոնը վերադարձավ. «Ուրարտու»-«Արթիկ» խաղն անցավ լարված

Երեկ «Միկա» մարզադահլիճում մեկնարկեց Հայաստանի բասկետբոլի Ա-լիգան:

Մինչ «Ուրարտու»-«Արթիկ» խաղի մեկնարկը տեղի ունեցավ մինչեւ 16-տարեկան բասկետբոլիստների միջեւ ցուցադրական հանդիպում: Ալբերտ Թադեւոսյանի թիմը ելույթ ունեցավ Դավիթ Խաչատրյանի թիմի դեմ, իսկ հաղթող դարձան Թադեւոսյանի տղաները: Լավագույն խաղացողի մրցանակին էլ արժանացավ Արտյոմ Նազլուխանյանը:

Իսկ ահա դիպուկ նետումների մրցման ժամանակ կազմակերպիչները մրցանակը հանձնեցին մեկ այլ երիտասարդի՝ Ներսես Ավագյանին:

«Արթիկ» թիմը

Լուսանկարը` A-League

Ա-լիգայի առաջին խաղն անցավ բավական լարված ու անզիջում պայքարում: Միմյանց դեմ մրցող «Ուրարտու»-ն եւ «Արթիկ»-ը հաջողությունը զարգացնում էին փոխնիփոխ: Զգացվում էր, որ թիմերը դեռ չեն մտել ռիթմի մեջ, սակայն երեւում էր մարզիչների աշխատանքն ու երկու կողմն էլ փորձում էր մեկնարկել հաղթանակով:

«Ուրարտու» թիմը

Լուսանկարը` A-League

Առաջին երկու քառորդում թեկուզ քիչ, բայց առավելությունը պահեցին Միքայել Պողոսյանի բասկետբոլիստները, իսկ վերջին քառորդներն անցան հավասար: Ի վերջո «Ուրարտու»-ն առավելության հասավ 97:94 հաշվով: