Տիկնիզյանի սերբական անձնագիրը, վիզայի խնդիրն ու ՀՖՖ-ի հավաստիացումը

Օրեր առաջ հայտնի դարձավ, որ «Ցրվենա Զվեզդա» տեղափոխված Հայաստանի հավաքականի պաշտպան Նաիր Տիկնիզյանը ստացել է նաեւ Սերբիայի քաղաքացիություն։

Ֆուտբոլիստը նման որոշման պատճառը հայտնել է «Матч ТВ»-ին․ «Իրավիճակը պարզ է։ Ակումբը համառորեն խորհուրդ տվեց ստանալ սերբական քաղաքացիություն, որպեսզի լեգիոներ չհամարվեմ։ Չհրաժարվեցի, որովհետեւ ոչինչ չէի կորցնելու։ Իսկապես, Սերբիայի անձնագիրը մեծ պլյուս է, որով Եվրոպայում տեղաշարժվելն ավելի հեշտ է»։

Իսկ ահա Metaratings.ru-ի տեղեկություններով, Տիկնիզյանը փաստաթղթերի խնդիրների պատճառով չի ստացել Իռլանդիայի վիզա, որի դեմ Հայաստանի հավաքականը խաղալու է հոկտեմբերի 14-ին։ 

Նրա գործակալ Ալեքսանդր Կլյուեւը sport-express.ru-ին հայտնել է, որ Հայաստանի ֆուտբոլի ֆեդերացիայից վստահեցրել են, որ խնդիրը կլուծեն։