Կառավարության այսօրվա նիստից հետո ՀՖՖ-ի նախագահ Արթուր Վանեցյանը պատասխանել է լրագրողների հարցերին ու նշել, որ ազգային հավաքականը գտնվում է ոչ լավ վիճակում, սակայն պետք է զինվել համբերությամբ:
«Գիտեմ, որ երկրպագուները շատ են սպասում, բայց նա, ով հասկանում է ֆուտբոլից, գիտի, որ չենք կարող օդից ունենալ մեսսիներ ու ռոնալդուներ: Պետք է շատ աշխատանք տանենք»,-ասել է Վանեցյանը:
Նա անդրադարձել է հավաքականի նախկին մարզիչ Վարդան Մինասյանին, որն Ազգերի Լիգայում երկու հանդիպում անցկացրեց թիմի հետ, ապա հրաժարական տվեց. «Իմ ընտրվելուց մեկ օր առաջ Մինասյանն անսպասելի հրաժարական տվեց: Սա բացասական ենք գնահատում, քանի որ նա կիսատ թողեց այս մրցափուլը: Ես նրան մեկ անգամ եմ հանդիպել մինչեւ ընտրությունը եւ ասել եմ, որ փոփոխություն չի լինելու, սակայն Մինասյանը որոշեց հեռանալ»:
Հայաստաn-Ջիբրալթար խաղից հետո տեղի ունեցած անկարգությունների համար ՈւԵՖԱ-ի կողմից տուգանք, ըստ ֆեդերացիայի նախագահի, դեռ չեն ստացել, սակայն իրենք չեն կարող թույլ տալ, որ որոշ խմբերի կողմից իրականցվի նման «խուլիգանություն»:
«Ես չեմ երազել լինել ՀՖՖ-ի նախագահ, ստացվեց այնպես, որ ինձ առաջարկեցին այս պաշտոնը: Մեծ սիրով եմ ղեկավարում այս կառույցը, բայց նախագահ դառնալը իմ նպատակը չի եղել»,-նշել է նա:
Վանեցյանն անդրադարձել է նաեւ Հենրիխ Մխիթարյանին դիվանագիտական անձնագրից զրկելու հանգամանքին. «Դիվանագիտական անձնագիրը տալիս են օրենքով, իսկ դրանից բխելով՝ Մխիթարյանին այն չի հասնում»:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: