Անգլիայի հավաքականի նախկին ավագ Դեւիդ Բեքհեմն այսօր տոնում է ծննդյան 47-ամյակը:
Իր կարիերայի ընթացքում նա 834 հանդիպման է մասնակցել, 146 գոլ խփել ու բազմաթիվ տիտղոսների արժանացել: Բայց ֆուտբոլիստի ամենամեծ ձեռքբերումներից մեկը համաշխարհային ճանաչումն ու փառքն են, կարիերան ավարտելուց շատ տարիներ անց էլ նրա նկատմամբ հետաքրքրությունը չի մարում:
Ֆուտբոլիստի տարեդարձի առիթով հավաքել ենք նրա առավել ուշագրավ մտքերը:
Մանկուց ինձ հետ մեծ հույսեր են կապել, այլ տարբերակ չունեի, քան հայտնի դառնալ:
Ֆուտբոլիստ եմ ծնվածս օրվանից:
Սիրում եմ, երբ ուշադրության կենտրոնում եմ, բայց միեւնույն ժամանակ շատ սովորական տղա եմ:
Լուսանկարը` MU
«Մանչեսթեր Յունայթեդում» պետք է ամեն օր տքնաջան աշխատեի, որ պայմանագրիս արժանի լինեի: Հիմա անգլիական ֆուտբոլում ամեն ինչ այլ է՝ 10 խաղ անցկացրիր Պրեմիեր Լիգայում եւ արդեն երթեւեկում ես մեծ մեքենայով ու անհավանական գումարներ ծախսում: Դա ինձ զայրացնում է:
ՄՅՈՒ-ում անցել է իմ ամենաերջանիկ շրջանը: Խաղացել եմ լեգենդար ֆուտբոլիստների հետ մի ակումբում, որի մասին մանկուց եմ երազել:
Ինձ էլ ավելի հարմարավետ չեմ զգալու, քան խաղադաշտում: Ֆուտբոլ եմ խաղացել 22 տարի, բայց միայն 38-ում նվաճել այն, ինչի մասին միայն երազել եմ:
Կարոտում եմ ֆուտբոլն ամեն օր, երբեմն թվում է, որ հենց հիմա էլ կարող եմ նորից վերադառնալ խաղադաշտ: Անգամ 50 տարեկանում նայելու եմ Անգլիայի հավաքականին ու մտածելու. «Աստված իմ, ես էլ այդպես կարող եմ»: Լավ է, որ իրատես ընկերներ ունեմ, երբ նրանց այս մասին պատմում եմ, պատասխանում են. «Մոռացիր այդ մասին ու լռիր, Դեւիդ»:
Լուսանկարը` BBC
Միակ անգամը, երբ հայրս ինձ ասել է ամեն ինչ ճիշտ եմ անում, եղել է, երբ Անգլիայի հավաքականի կազմում առաջին գոլս եմ խփել:
Ֆուտբոլում չափազանց կարեւոր է լավ սանրվածք ունենալ, քանի որ շատ մարդ է հետեւում, ամենուր տեսախցիկներով աղջիկներ են գալիս քեզ տեսնելու: Քո արտաքին տեսքից է կախված խաղի հայտնիությունը:
Ֆուտբոլի կանոնները շատ պարզ են, եթե շարժվում է, հարվածիր, եթե չի շարժվում, էլի հարվածիր, մինչեւ որ սկսի շարժվել:
Լուսանկարը` Real Madrid
Միակ սնահավատությունս երկար թեւերով խաղալն էր՝ անգամ շոգ եղանակին: Շատ հաճախ մարդիկ չէին կարողանում հասկանալ, թե ինչպես եմ խաղում 39 աստիճան շոգի պայմաններում:
Կարծում եմ, որ Զիդանը մերօրյա լավագույն խաղացողն է: Էրիկ Կանտոնան հատուկ էր, նա թագավոր էր «Օլդ Թրաֆորդում» ու այդպիսին էլ կմնա:
Միշտ հարգել եմ Ալեքս Ֆերգյուսոնին, նա հոր պես էր, անհավանական շատ բան է արել ինձ համար:
Խաղացողներ, ինչպիսիք են Մեսսին ու Ռոնալդուն, հանկարծակի չեն ի հայտ գալիս: Նրանք շատ են աշխատում, հենց դա եմ փորձում բացատրել իմ ու մյուսների երեխաներին: Նրանք այդքան լավ են հանդես գալիս միայն համառ աշխատանքի շնորհիվ:
Լուսանկարը` BBC
Երեխաներիս միշտ ասում եմ, որ շատ աշխատելու դեպքում կյանքում ամեն ինչի կհասնեն:
Բոլորն էլ վատ ժամանակներ են ունենում, պետք է ուժ գտնել ու հաղթահարել ամեն ինչ:
Մինչ Վիկտորիային հանդիպելը կարծել եմ, որ ինձ դուր են գալիս լուռ շիկահերները: Բայց նա լրիվ հակապատկեր է՝ սեւահեր է, բացի այդ էլ անընդհատ աղմկում է:
Ամեն օր Վիկտորիայի հետ իրար ռոմանտիկ ժեստեր ենք անում՝ գրում ենք նամակներ, միմյանց համար նախաճաշ սարքում: Երջանիկ ենք, քանի որ մեր ցանկությունները համընկնում են:
Հպարտ եմ նրա համար, թողել է Spice Girls-ը՝ ամենահայտնի խմբերից մեկը, որպեսզի դառնա հաջողակ դիզայներ, ու դա նրան հաջողվել է: Անհավանական է:
Տղամարդու ամեն ինչը պետք է արտակարգ լինի, հատկապես՝ նրա կինը:
Իմ անենահայտնի ընկերը Թոմ Քրուզն է, նա ինձնից էլ ճանաչված է:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: