2016 թվականի ամռանը սպորտային կյանքում կարեւոր իրադարձություն էր տեղի ունենում՝ կայանում էին Ռիո դե Ժանեյրոյի Օլիմպիական խաղերը:
Այն ոչ պակաս կարեւոր էր նաեւ Mediamax Sport-ի լրագրողների համար, քանի որ մենք աշխատելու էինք հենց մրցավայրից:
Լուսանկարը` Մեդիամաքս
Վայրէջք կատարելուց անմիջապես հետո էլ սկսվեց մեր աշխատանքը՝ ֆիքսեցինք Օլիմպիական շունչ ստացած օդանավակայանն ու փողոցները: Ցանկացած նոր բան, ինչին ականատես էինք լինում, արագ փոխանցում էինք մեր ընթերցողներին:
Լուսանկարը` Մեդիամաքս
Չորս տարի անց, երբ փորփրում էի արխիվները, նկատեցի, որ, ամեն դեպքում, մնացել են ոչ սպորտային կադրեր, որոնք այդպես էլ նախկինում չենք օգտագործել:
Լուսանկարը` Մեդիամաքս
Բացման արարողության ժամանակ, երբ «Մարականան» պարզապես պայթում էր բարձր երաժշտությունից, մարդկանց ուրախ ձայներից ու լուսային անհավանական շոուից, նկատեցի կազմակերպիչներից այս մեկին: Երեւի շատ էր հոգնել ու անկախ աղմուկից, կարողացավ քնել:
Լուսանկարը` Մեդիամաքս
Բրազիլիայում բոլորն են ապրում ֆուտբոլով: Սա նկարել եմ ըմբշամարտի մրցումների ժամանակ: Չնայած կամավորն աշխատում էր ըմբշամարտի դահլիճում, բայց զուգահեռ մեծ ոգևորությամբ հետում էր ֆուտբոլի ազգային հավաքականի ելույթին:
Լուսանկարը` Մեդիամաքս
Կրկին ըմբշամարտի մասին: Մրցավարներից մեկն է, որն առավոտից մինչեւ ուշ երեկո աշխատելուց հետո որոշել էր ոտքերին մի քիչ հանգստություն տալ:
Լուսանկարը` Մեդիամաքս
Իսկ հրաձգության Գերմանիայի հավաքականի մարզիչը նույնիսկ գուլպաններն էր Օլիմպիական օղակներով զարդարել:
Լուսանկարը` Մեդիամաքս
Հաջորդ նկարին ուշադրություն դարձրեք: Ծանոթ տառեր տեսա՞ք: Լրագրողների ավանի ճաշարանում շատ զարմացա, երբ սկուտեղի վրա նկատեցի «Սովետական Հայաստան» թերթի այս հատվածը:
Լուսանկարը` Մեդիամաքս
Ռիոյի փողոցները պայծառ են, գունեղ, կարծես ամեն օր այնտեղ տոն է:
Լուսանկարը` Մեդիամաքս
Մարդիկ վայելում են իրենց օրը: Կապ չունի, որ աղքատիկ ֆավելլայի բնակիչ են՝ կարեւորը լողում են տաք ջրերում ու մի լավ ուրախանում:
Լուսանկարը` Մեդիամաքս
Ֆավելլաների պատերը զարդարված են՝ Բրազիլիայի ազգային դրոշից մինչեւ այս կամ այն հայտնի մարդու դիմանկարով:
Լուսանկարը` Մեդիամաքս
Մեր միակ ազատ օրը ամենաապահով ֆավելաններից մեկով բարձրացանք Երկու եղբայր սարը:
Լուսանկարը` Մեդիամաքս
Խիտ անտառներում մեզ հանդիպում էին ամենատարբեր կենդանիներ: Դրանցից մեկն այս կապիկն է, որը մի քանի րոպե թռվռալով ուղեկցեց մեզ:
Լուսանկարը` Մեդիամաքս
Հրաշալի տեսարանների ականատես լինելով՝ վերջապես հասանք սարի գագաթը: Աննկարագրելի տեսարան, ճայերի ձայներ, հեռվից լսվող օվկիանոսի խշշոց ու հիանալի զգացողություններ:
Լուսանկարը` Մեդիամաքս
Մարդկանցով լեցուն ու վառ Կոպակաբանայի մայթերով քայլելը շատ հաճելի է:
Լուսանկարը` Մեդիամաքս
Մանավանդ, երբ անցնում ես ավազի վրայով ու կամաց-կամաց մոտենում օվկիանոսին:
Լուսանկարը` Մեդիամաքս
Կոպակաբանայի ափն ամենագեղեցիկներից է: Միլիոնավոր զբոսաշրջիկներ են այստեղ լինում, սակայն բրազիլացիների պես այն ոչ ոք չի վայելում:
Լուսանկարը` Մեդիամաքս
Իսկ այնտեղից երեւում է հայտնի Շաքարի գլուխ լեռը, որը համարվում է Ռիոյի տեսարժան վայրերից մեկը:
Լուսանկարը` Մեդիամաքս
Լեռներով պատված այս զարմանալի քաղաքում անմոռանալի է օրվա ամեն պահը: Վայելենք երեկոն:
Լուսանկարը` Մեդիամաքս
Անբացատրելի, մոգական ու առեղծվածային է Հիսուսի արձանը: Երկար ճանապարհ հաղթահարելուց, տասնյակ ոլորաններ անցնելուց հետո քո առջեւ վեր է խոյանում հսկայական այս արձանը:
Լուսանկարը` Մեդիամաքս
Ահա եւ գիշերային Ռիոն: Հիսուս Քրիստոսի արձանն ամենաբարձր կետում է գտնվում ու այնտեղից հսկում է ողջ քաղաքը: Ահա թե ինչպիսի տեսարան է բացում արձանի մոտից:
Լուսանկարը` Մեդիամաքս
Հագեցած, անմոռանալի հիշողություններ ու զգացողություններ թողած Ռիոյի ուշ երեկոյի ընթացքում արժե մեկ բաժակ բրազիլական հայտնի կայպիրինյա վայելել:
Լուսանկարը` Մեդիամաքս
Վերջում էլ կարող եք դիտել մեր պատրաստած այս տեսանյութը, որը շատ փոքր մասն է Ռիոյում անցկացրած օրերի մասին:
Գոհար Նալբանդյան
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: