Սպորտային Լոռին. Բասկետբոլային «Ուրարտուն» կներկայացնի Վանաձորը

Հայաստանի առաջնության արծաթե ու բասկետբոլի Ա լիգայի բրոնզե մեդալակիր Երեւանի «Ուրարտու» բասկետբոլային ակումբն այսուհետ ներկայացնելու է Վանաձորը:

Այս մասին այսօր Վանաձորում կայացած մամուլի ասուլիսի ժամանակ հայտնել է ակումբի նախագահ Կարեն Գիլոյանը: Հանդիպմանը ներկա են եղել նաեւ «Ուրարտուի» նոր մարզիչ Միքայել Պողոսյանը, թիմի ավագ Թովմաս Օրդանյանն ու Վանաձորի քաղաքապետ Մամիկոն Ասլանյանը:

 

Կարեն Գիլոյան

Ակումբն այսուհետ վանաձորյան գրանցում է ստանում: Ներկայացնելու ենք սպորտային բազմաթիվ նվաճումներ ու պատմություն ունեցող քաղաք: Մտածեցինք, որ այն նաեւ խաղային մարզաձեւերում պետք է ներկայացված լինի:

Վանաձորում սպորտ սիրում են, հուսանք՝ շատ երկրպագուներ կգան մեր հանդիպումները դիտելու:

Թիմի կորիզը հիմնականում պահպանել ենք, ավագը մնացել է, նոր մարզիչ ունենք: Միքայելը հանդես է եկել Հայաստանի հավաքականում, նա ծնկահոդի վնասվածք է ստացել ու վիրահատվել: Հույս ունենք, որ մրցաշրջանի երկրորդ հատվածում կվերադառնա ու խաղացող մարզիչ կլինի: Միքայելը շատ հեռանկարային ու հեռուն գնացող մարզիչ է:

Մեր նպատակն է քաղաքում մարզաձեւը զարգացնել, պայքարելու ենք միայն չեմպիոնության համար, փորձելու ենք նաեւ հետագայում հանդես գալ եվրոպական մրցաշարերում:

Հանդիպումներն անցկացնելու ենք Ստեփան Սարգսյանի անվան սպորտային պալատում, այն մոտ 1700 հանդիսական է տեղավորում: Պետք է պարզապես լուսավորության հարցը լուծել ու օղակները փոխել: Հետագայում նպատակ ունենք նաեւ հատակը փոխել:

«Ուրարտուի» առաջին հանդիպումը հոկտեմբերի 6-ին պետք է կայանար, բայց այդ օրը Վանաձորի տոնն է, մենք կլինենք այստեղ ու կներկայանանք միջոցառմանը:

Լուսանկարը` Մեդիամաքս

Միքայել Պողոսյան

Թիմի մի քանի խաղացողներ մնացել են, այդ թվում Թովմասը: Մենք նաեւ համալրումներ ունենք, երկու խաղացող ԱՄՆ-ից կլինեն, բավականին փորձառու են: Միայն լուրջ նպատակներ ենք դնելու թիմի առաջ, փորձելու ենք առաջին տեղը գրավել: Մրցաշրջանին կսկսենք պատրաստվել մոտ 10 օրից, երբ մեր լեգիոներները միանան:

Թովմաս Օրդանյան

Շատ եմ սիրում այս քաղաքը, ուրախ եմ, որ թիմի ավագն եմ լինելու: Մարտական ենք տրամադրված, լավ կազմ ենք ձեւավորել, տնային հանդիպումներին կոչ եմ անում բոլորին գալ ու աջակցել մեզ:

 

Մամիկոն Ասլանյան

Վանաձորը հիմնականում մենապայքարային ձեւերում է հաջողություններ գրանցել, ուրախ ենք, որ ֆուտբոլային ակումբից բացի նաեւ բասկետբոլային թիմ կունենանք: «Լոռին» հիանալի է հանդես գալիս ֆուտբոլի Բարձրագույն խմբում ու առաջատարն է, աշխատում եմ բոլոր հանդիպումներին ներկա լինել, կփորձեմ բասկետբոլային խաղերն էլ դահլիճում դիտել: Անհրաժեշտ օգնություն ենք ցուցաբերելու երկու թիմերին էլ: