Մինչեւ ԵԱ հունհառոմեականները երեք հավաք կունենան

Հայաստանի հունահռոմեական ոճի ըմբշամարտի հավաքականը վերադարձել է Կիեւից, որտեղ կայացած միջազգային մրցաշարում նվաճել է 7 մեդալ:

Mediamax Sport-ի թղթակցի հետ զրույցում հավաքականի մարզիչ Գեւորգ Ալեքսանյանն ասել է, որ այս մրցաշարը եղել է Եվրոպայի առաջնության նախապատրաստական փուլերից մեկը:

«Մեզ պետք էր, որպեսզի տղաներին տեսնեինք գործի մեջ: 9 ըմբիշով մասնակցեցինք, եւ նրանցից 7-ը դարձավ մեդալակիր: Հիմա մի փոքր հանգստանալուց հետո կրկին կսկսենք հավաքները»,- ասել է Ալեքսանյանը:

Ըմբիշները մարտի 12-18-ը կարճ հավաք կունենան Երեւանում, ապա կմեկնեն Ծաղկաձոր: Երկշաբաթյա պարապմունքներից հետո ապրիլին թիմը կուղեւորվի Մինսկ հավաքի, այնտեղից էլ կմեկնի Նովի Սադ՝ մասնակցելու Եվրոպայի առաջնությանը: