Հռիփսիմե Խուրշուդյանի հուզիչ հրաժեշտը. Իր վերջին ԵԱ-ում նա բրոնզե մեդալ նվաճեց

Ծանրամարտի Եվրոպայի առաջնությունում որոշվել են մինչեւ 87 կգ քաշային կարգի մեդալակիրները։ Սոֆիայում Հայաստանը ներկայացրել են Հռիփսիմե Խուրշուդյանն ու Տաթեւ Հակոբյանը։

Խուրշուդյանը պոկման առաջին մոտեցմանը շատ հանգիստ է գործել ու բարձրացրել 102 կգ, Հակոբյանն էլ նույն վստահությամբ գրանցել է 103-ը, սակայն մյուս երկու փորձերը նա ձախողել է։ Խուրշուդյանը 3 կգ-ոց քայլ է կատարել ու քաշը գլխավերեւում պահել երկրորդ անգամից՝ ապահովելով փոքր բրոնզե մեդալ։

Հրումը նա 122 կգ-ով է սկսել, սակայն մրցավարները քաշը չեն հաշվել, ծանրորդը նորից է մոտեցել ու հաջողության հասել։ 125 կգ-ը Խուրշուդյանը չի կարողացել գրանցել, ինչից հետո հանել է մարզակոշիկներն ու արցունքն աչքերին ցույց տվել, որ վերջին անգամ էր ելույթ ունենում Եվրոպայի առաջնությունում։ Երկամարտի 227 կգ-ով 36-ամյա ծանրորդը բրոնզե մեդալակիր է դարձել։

Իսկ ահա Հակոբյանը հրման 3 մոտեցումներից միայն մեկն է օգտագործել ու 124 կգ ցույց տվել։ Նա էլ երկամարտում 227 կգ է գրանցել ու ելույթն ավարտել 4-րդ տեղում։

Լուսանկարը` Photolure

Մրցակցությունից դուրս է եղել ու երկամարտի 280 կգ-ով չեմպիոն է հռչակվել նորվեգացի Սոլֆրիդ Կոանդան։ 

Այսօր մինչեւ 102 կգ քաշային կարգում Սամվել Գասպարյանը դարձել է արծաթե մեդալակիր, իսկ Գարիկ Կարապետյանը կանգնել պատվոհարթակի 3-րդ աստիճանին։

Վաղն առաջնությունում պայքարի մեջ են մտնելու վերջին երկու քաշային կարգի ներկայացուցիչները։ +109 կգ-ում հանդես են գալու Վարազդատ Լալայանն ու Սիմոն Մարտիրոսյանը։