Հայաստանի այս տարվա դահուկավազքի առաջնությունը Ծաղկաձորի փոխարեն կայանալու է Աշոցքում: Տեղափոխության պատճառը ձնի սակավությունն է:
Առաջնությանը կմասնակցեն մոտ 50 մարզիկներ, կլինեն նաեւ դահուկորդներ Իրանից, Մեքսիկայից, Չիլիից ու Բրազիլիայից: Քանի որ մրցաշարը վարկանշային է, նրանք կփորձեն ապահովել իրենց մասնակցությունը 2018-ի Օլիմպիական խաղերում:
Հայաստանի դահուկասպորտի ֆեդերացիայի գլխավոր քարտուղար Գագիկ Սարգսյանը Mediamax Sport-ին ասել է, որ Հայաստանի առաջնությամբ նաեւ սկսելու են զարգացնել դահուկային սպորտի նոր կենտրոնը:
«Փորձելու ենք Աշոցքին միջազգային ճանաչում տալ ու հավաքականների մարզումային լուրջ կենտրոն դարձնել: Հայաստանյան մրցաշարերի մեծ մասն այնտեղ ենք անցկացնելու: Դահուկասպորտի միջազգային ֆեդերացիայի ու դոնոր կազմակերպությունների աջակցությամբ այն փորձելու ենք զարգացնել»,- նշել է Սարգսյանը:
Ըստ նրա՝ կան բոլոր անհրաժեշտ նախադրյալները. հարմար բնակլիմայական պայմանները, նոր Հյուսիս-հարավ ճանապարհի կառուցումը, Գյումրու օդանավակայանը, Վրաստանին սահմանակից լինելը:
«Գյումրուց հեռավորությունն ընդամենը 30 կմ է, մենք հնարավորություն կտանք էժան ավիատոմսերով մարզվել հիանալի պայմաններում: Արդեն հրաշալի դահուկուղի ունենք, մի քանի օր է այն շահագործվում է»,- ավելացրել է նա:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: