Հայաստանի ընտրանին դուրս մնաց ԱԱ-ի հետագա պայքարից

Հայաստանի բասկետբոլի հավաքականն Աշխարհի առաջնության նախընտարական վերջին խաղն անցկացրեց Երեւանում: Մրցակիցը Բոսնիայի եւ Հերցեգովինայի ընտրանին էր:

Վերջին խաղն անչափ կարեւոր էր երկու թիմերի համար էլ, քանի որ հաղթողն իրավունք էր ստանալու դուրս գալ հաջորդ փուլ:

Առաջին իսկ րոպեներից հայ բասկետբոլիստներին հսկայական աջակցություն էին ցույց տալիս երկրպագուները: Հաշվի մեջ մեկ առաջ էին լինում տանտերերը, մեկ` հյուրերը: Առաջին քառորդում Նիկշա Բավցեւիչի սաները հաղթեցին նվազագույն հաշվով` 25:24:

Երկրորդում հայերը կրկին փոքրիկ առավելություն ունեին, սակայն վերջին րոպեներին մրցակիցը կարողացավ հստակ իրացնել հնարավորություններն ու հաղթել 43:41 հաշվով:

Վերջին երկու քառորդում Հայաստանի հավաքականն ակնհայտորեն զիջեց դիրքերն ու թույլ տվեց մրցակցին տիրել նախաձեռնությանը: Չնայած կազմակերպած գրոհներին` հայկական թիմը չէր կարողանում դիպուկ նետումներ կատարել: 

Հանդիպումն ավարտվեց 66:83 հաշվով, ու Հայաստանի ընտրանին նախընտրական A խմբում գրավեց 3-րդ հորիզոնականը` դուրս մնալով հետագա պայքարից: