2016-ի հաղթական ու անմոռանալի սպորտային պահերն ամփոփված են ու ապրում են լուսանկարներում:
Տարիներ անց էլ սպորտի սիրահարները կրկին վայելու են Նեյմարի հաղթական ժպիտը, տեսնելու են, թե ինչպես է փոքրիկ աֆղանստանցի տղան հանդիպում Լեո Մեսսիին կամ ինչպես է իր «ատամները ցուցադրում» Ուսեյն Բոլտը:
Այդ գեղեցիկ կադրերն էլ Mediamax Sport-ը ներկայացնում է ձեր ուշադրությանը:
Ֆրանսիական համբույրը
Լուսանկարը` The New York Time
ԵՎՐՈ-2016-ում ֆրանսիացիները սեփական հարկի տակ շատ վստահ հանդես եկան ու հասան մինչեւ եզրափակիչ:
ԵԱ-ի կիսաեզրափակչի ուղեգիրը Ֆրանսիայի ընտրանին նվաճեց Իսլանդիայի դեմ խաղում՝ հաղթելով 5:2 հաշվով:
Հանդիպման 3-րդ գնդակը իր հաշվին գրանցեց Դիմիտրի Պայետը, մի քանի րոպե անց էլ աչքի ընկավ Անտուան Գրիզմանն ու 4 գնդակով գլխավորեց ԵՎՐՈ-2016-ի ռմբարկուների ցանկը: Նախ՝ նա համբուրեց Գրիզմանի խաղակոշիկը, այնուհետեւ Պայետի հետ փոխվեցին տեղերով:
Բաստիանի արցունքները
Լուսանկարը` newsday.com
12 տարի, 121 հանդիպում ու 24 գնդակ: 2016-ի ամռանը Բաստիան Շվայնշտայգերը ավարտեց իր ելույթները Գերմանիայի ազգային հավաքականի կազմում:
Վերջին անգամ նա ավագի թեւկապով հանդես եկավ Ֆինլանդիայի դեմ խաղում, որն ավարտվեց գերմանացիների 2:0 հաշվով հաղթանակով:
Ողջ թիմն ու մարզչական շտաբը, ստադիոնում հավաքված հազարավոր երկրագուներն իրենց հարգանքի տուրքը մատուցեցին ու հրաժեշտ տվեցին Բաստիանին: 32-ամյա ֆուտբոլիստը չկարողացավ զսպել արցունքներն ու հույզերը:
Նեյմարի ցնծությունը
Լուսանկարը` The Sun
Իրենց հայրենիքում Բրազիլիայի ֆուտբոլի հավաքականը կարողացավ դառնալ Օլիմպիական չեմպիոն:
Եզրափակչում Բրազիլիայի ընտրանին հաղթեց Գերմանիային՝ այդկերպ վրեժխնդիր լինելով ԱԱ-2014-ում (1:7) կրած պարտության համար:
Հաղթողը որոշվեց 11-մետրանոց հարվածաշարում, վերջին գնդակն իրացրեց Նեյմարը՝ տոնի վերածելով ամբողջ «Մարականան» ու Բրազիլիան:
Նեյմարը ոսկե մեդալն ու այդ աննախադեպ նվաճումը նշանավորեց «Հիսուս» գրությամբ ու չեմպիոնին վայել ժպիտով:
Չեմպիոնի ժպիտը
Լուսանկարը` Getty Images
Ուսեյն Բոլտը մեկ անգամ չէ, որ ապացուցել է իր մեծությունը: 3 անընդմեջ Օլիմպիական խաղերում նա ցույց է տվել, որ լավագույնն է աշխարհում:
Ռիոյի Օլիմպիական խաղերում էլ ճամայկացի աթլետն իր բարձունքում էր:
100 մ վազքի կիսաեզրափակչում նա այնքան վստահ էր իր ուժերին ու հաղթանակին, որ եզրագիծը հատելուց առաջ անգամ ժամանակ գտավ ու ժպտաց Getty Images-ի լուսանկարիչ Քեմերոն Սպենսերին:
Երազանքի կատարումը
Լուսանկարը` rte.ie
Մորթազա Ահմադ անունը քչերը գիտեն, սակայն բավական է հիշեցնել պոլիէթիլենային տոպրակի վրա Մեսսի գրությամբ փոքրիկ տղային, երբ բոլորը միանգամից հիշում են նրան:
5-ամյա Ահմադը ֆուտբոլ շատ է սիրում ու օրերով խաղում է իրենց տան բակում: Փոքրիկը շատ էր ցանկանում ունենալ իր սիրելի ֆուտբոլիստի՝ Մեսսիի մարզաշապիկը, սակայն ընտանիքը հնարավորություն չուներ այն գնել: Օրերով արտասվող Ահմադին օգնեց եղբայրը, հենց նա պատրաստեց «հայտնի մարզաշապիկը»:
Տղայի լուսանկարը միանգամից տարածվեց համացանցում ու նրան Լեո Մեսսիի ամենահայտնի երկրպագուն դարձրեց:
Ֆուտբոլիստի ու Ահմադի հանդիպումը կայացավ 2016-ի դեկտեմբերին Քաթարում: Փոքրիկի երջանկությունն անսահման էր, նա մի րոպեով անգամ չէր ցանկանում հեռանալ իր կուռքից:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: