Խնձրցյանն ու Մուսիկյանը Լյովա Վարդանյանի անվան հուշամրցաշարի հաղթողներն են

«Դինամո» մարզահամալիրում շարունակվող Հայաստանի վաստակավոր մարզիչ Լյովա Վարդանյանին նվիրված Մ-23 տարեկանների ազատ ոճի ըմբշամարտի միջազգային 3-րդ հուշամրցաշարում հայտնի են դարձել առաջին հաղթողները։

Այս տարի ելույթ են ունենում 9 երկրի՝ Հայաստանի, Իրանի, Վրաստանի, Ռուսաստանի, Բելառուսի, Մոլդովայի, Ղազախստանի, Ղրղզստանի եւ Իտալիայի ավելի քան 140 ըմբիշներ, հայտնում է ԿԳՄՍ-ն։

Հայաստանի հավաքականի կազմում հաղթողներ են դարձել Մանվել Խնձրցյանն (61 կգ) ու Արման Մուսիկյանը (65 կգ): 2-րդ մրցանակակիրներն են Հելբերտ Սահակյանը (57 կգ), Սարգիս Բեգոյանը (61 կգ), Անուշավան Բարսեղյանը (70 կգ) եւ Նարեկ Նիկողոսյանը (74 կգ):

Բրոնզե մեդալներ էլ նվաճել են Հայկ Գասպարյանը (57 կգ), Արման Հարությունյանը (57 կգ), Լեւիկ Միքայելյանը (61 կգ), Տիգրան Ղազարյանը (70 կգ), Դավիթ Մարգարյանը (70 կգ) եւ Նարեկ Հարությունյանը (74 կգ)։

ԿԳՄՍ նախարարի տեղակալ Կարեն Գիլոյանը կարեւորել է հուշամրցաշարի անցկացումը՝ որպես հարգանքի տուրք անվանի մասնագետի հիշատակին: «Լյովա Վարդանյանը մեծ նվիրյալ էր ու նաեւ հիանալի մարդ: Այսպիսի մրցաշարերը շատ կարեւոր են երկրի ճանաչման ու մեր մարզիկներին փորձի ձեռքբերման առումով, որի շնորհիվ հետագայում կկարողանան տիտղոսներ նվաճել ամենաբարձր հարթակներում»,- նշել է նա:

Հուշամրցաշարի եզրափակիչներն ու բրոնզե մեդալի համար գոտեմարտերը շարունակվելու են նաեւ այսօր։