Պատանեկան ԵԱ-ին հունահռոմեականների թիմը կմասնակցի նոր ըմբիշներով

Ըմբշամարտի պատանիների Եվրոպայի առաջնությունը կայանալու է հուլիսի 22-31-ը Սարաեւոյում:

Հայաստանի ազատ ոճի հավաքականը հանդես է գալու 9 ըմբիշով եւ պայքարի է դուրս գալու առաջինը:

Արդեն հուլիսի 28-ից ելույթ են ունենալու հունահռոմեական ոճի ըմբիշները:

Mediamax Sport-ի թղթակցի հետ զրույցում հավաքականի գլխավոր մարզիչ Գագիկ Խաչատրյանն ասել է, որ մրցավայր են մեկնելու հուլիսի 25-ին:

«Մեր թիմում շատ նորեկներ են ընդգրկվել, հիմնականում 2001 թվականին ծնվածներ են ու առաջին անգամն են ելույթ ունենալու այսպիսի խոշոր մրցաշարում: Նախորդ տարվա առաջնությանը մասնակցած տղաներն արդեն համալրել են երիտասարդական հավաքականի կազմը»,- ասել է Խաչատրյանը:

ԵԱ-ում հանդես են գալու Գառնիկ Հովհաննիսյանը (42 կգ), Ռոբերտ Կարապետյանը (48 կգ), Հայկ Ասատրյանը (50 կգ), Սամվել Աղաջանյանը (54 կգ), Աշոտ Կիրակոսյանը (58 կգ), Շանթ Խաչատրյանը (63 կգ), Սարգիս Թադեւոսյանը (69 կգ), Վահե Պողոսյանը (76 կգ) եւ Տիգրան Համբարձումյանը (85 կգ):