Եվրոպայի առաջնությունում Արթուր Դավթյանի հերթական մեդալն արծաթե էր

Ռիմինիում կայացած մարմնամարզության Եվրոպայի առաջնությունում Հայաստանի հավաքականը մեծահասակների պայքարում քիչ առաջ նվաճեց առաջին մեդալը։

Հենացատկում Եվրոպայի եւ Աշխարհի չեմպիոն, Օլիմպիական բրոնզե մեդալակիր Արթուր Դավթյանը ցույց տվեց գեղեցիկ ցատկեր ու վաստակեց 14,850 միավոր։ Նա այդ արդյունքով նվաճեց արծաթե մեդալ։ 

Այս վարժությունում Եվրոպայի չեմպիոնի կոչումը բաժին հասավ Մեծ Բրիտանիան ներկայացնող Ջեք Ջերմանին՝ 14,883 միավոր։

Երեկ Հայաստանի հավաքականից Արթուր Ավետիսյանն օղակների վրա ելույթն ավարտել էր 4-րդ, իսկ Գագիկ Խաչիկյանը նժույգթափերում՝ 9-րդ տեղում։

Երիտասարդական պայքարում Համլետ Մանուկյանը նվաճել էր ոսկե մեդալ, իսկ Մամիկոն Խաչատրյանը՝ բրոնզե։ Նրանք հանդես էին եկել նժույգթափերում։