Մալխաս Ամոյանն Աշխարհի առաջնության եզրափակչում է

Մալխաս Ամոյանը Զագրեբում ընթացող Աշխարհի առաջնությունում կպայքարի իր երկրորդ ոսկե մեդալի համար։

Եվրոպայի քառակի չեմպիոնն ու Օլիմպիական խաղերի բրոնզե մեդալակիրը մինչեւ 77 կգ քաշային կարգի կիսաեզրափակչում հանդիպել է իրանցի Ալիռեզա Մորադ Աբդեվալիի հետ։ Հունահռոմեական ոճի ըմբիշը գոտեմարտն ակտիվ է սկսել ու գործել առաջին համարով։ Մրցափուլի միջնամասին չհասած՝ նա արդեն առաջ էր 5:0 հաշվով։ 

Երկրորդ մրցափուլը հակառակ սցենարով է մեկնարկել, արդեն Ամոյանն էր պասիվ՝ Աբդեվալիին մեկ միավոր տալով, բայց պարտերում հիանալի է պաշտպանվել։

Ամոյանը հաղթել է 5:1 հաշվով եւ դուրս է եկել ԱԱ-ի եզրափակիչ։ 2021 թվականի չեմպիոնությունից 4 տարի անց նա վաղը կփորձի իր երկրորդ ոսկին նվաճել։ Այն ժամանակ Ամոյանը հաղթել էր մինչեւ 72 կգ քաշային կարգում։

Ամոյանն ԱԱ-ում մեկնարկել է 1/16 եզրափակչում եւ տպավորիչ հաղթանակներ տարել։ Նա ուժեղ է եղել նաեւ ամերիկացի Քամալ Ամիր Բեյից (2:1), լեհ Մատեուշ Բերնատեկից (10:0) եւ թուրք Ահմետ Յիլմազից (3:1):

Այսօր պայքարի դուրս եկած Մանվել Խաչատրյանը (55 կգ) եւ Սամվել Գրիգորյանը (82 կգ) զիջել են մեկնարկում, իսկ Ռազմիկ Քուրդյանն (130 կգ) ադրբեջանցի Բեկա Կանդելակին հաղթելուց հետո հաջորդ գոտեմարտում զիջել է։