Աշխարհի քառակի չեմպիոնը. Արթուր Ալեքսանյանի փառահեղ վերադարձը

Հայաստանի հունահռոմեական ոճի ըմբշամարտի հավաքականը Բելգրադում ընթացող Աշխարհի առաջնությունում նվաճեց 2-րդ մեդալը:

Աշխարհի եռակի չեմպիոն Արթուր Ալեքսանյանը (97 կգ) Տոկիոյի խաղերում արծաթե մեդալ նվաճելուց հետո առաջին խոշոր մրցաշարն անցկացրեց: Ու նրա վերադարձը փառահեղ էր:

Եզրափակչում Կիրիլ Միլենով Միլովի (Բուլղարիա) դեմ գոտեմարտի առաջին մրցափուլում մրցավարը պասիվ տվեց մրցակցին ու 1 միավոր՝ Ալեքսանյանին: Օլիմպիական չեմպիոնը հիանալի աշխատեց պարտերում ու հաշիվը դարձրեց 5:0:

Երկրորդում Միլովին հաջողվեց վերադարձնել 1 միավոր ու ոչ ավելին: Հայ մարզիկը հիանալի պաշտպանվեց ու նվաճեց Աշխարհի չեմպիոնի տիտղոսը: 5 տարի անց Ալեքսանյանը նվաճեց Աշխարհի առաջնության իր 4-րդ ոսկե մեդալը:

Այսօր ավելի վաղ Հրաչյա Պողոսյանը (60 կգ) բրոնզե մեդալի համար գոտեմարտում պարտվել էր Թալեհ Մամադովից (Ադրբեջան): Հետագա պայքարից դուրս էին մնացել նաեւ Գեւորգ Ղարիբյանն ու Դավիթ Օվասափյանը:

Երեկ ԱԱ-ի բրոնզե մեդալակիր էր դարձել Եվրոպայի չեմպիոն Մալխաս Ամոյանը (77 կգ):