Ազատ ոճի ըմբիշները պատրաստվում եմ Կիեւի մրցաշարին

Հայաստանի ազատ ոճի ըմբշամարտի հավաքականն Օլիմպավանում հավաք է անցկացնում ու պատրաստվում փետրվարին 23-25-ը Կիեւում կայանալիք միջազգային մրցաշարին:

Այնտեղ ելույթ են ունենալու Միհրան Ջաբուրյանը, Գարիկ Բարսեղյանը (57 կգ), Վալոդյա Ֆրանգուլյանը (65 կգ), Վալտեր Մարգարյանը, Նարեկ Սիրունյանը (70 կգ), Գրիգոր Գրիգորյանը (74 կգ), Վարուժան Կաջոյանը (79 կգ), Մարզպես Գալստյանը (86 կգ) եւ Շամիր Աթյանը (92 կգ):

Թիմի գլխավոր մարզիչ Հաբեթնակ Կուրղինյանը Mediamax Sport-ին ասել է, որ սա իրենց 2-րդ հավաքն է, առաջինն անցկացրել են Ծաղկաձորում ու հիմնականում աշխատել ֆիզիկական պատրաստվածության վրա:

«Տղաների մարզավիճակը նորմալ եմ գնահատում, կարեւորը վնասվածքներ չունենք, աստիճանաբար ավելի լավ տեսք կունենանք: Մեզ հետ մարզվում են նաեւ երիտասարդ ըմբիշները, որոնք Հայաստանի առաջնությունում լավ դրսեւորեցին իրենց ու մրցանակային տեղեր գրավեցին: Մարտի 1-3-ը նրանք կմասնակցեն Հարոյանի հուշամրցաշարին, որն ընտրական է լինելու Մ-23 տ. Եվրոպայի առաջնության համար»,- ավելացրել է Կուրղինյանը:

Առաջին հավաքի պես այս անգամ էլ թիմի հետ չեն Գեորգի Կետոեւն ու Լեւան Բերիանիձեն, նրանք առանձին են մարզվում ու հավաքականին կմիանան Եվրոպայի առաջնությունից առաջ: