Արման Ծառուկյանը մրցավարների որոշմամբ զիջել է Մատեուշ Գամրոտին

Լաս Վեգասում կայացած UFC Fight Night 208-ի շրջանակում Արման Ծառուկյանը հանդիպել է լեհ Մատեուշ Գամրոտին ու պարտություն կրել:

Նա 5 ռաունդների ընթացքում համառորեն պայքարել է մրցակցի հետ, սակայն զիջել է մրցավարների միաձայն որոշմամբ: Շատերը, այդ թվում եւ մարզիկն այդ որոշումը համարել են անարդար: Ծառուկյանի համար պարտությունն անսպասելի է եղել, նա նստել է ծնկների վրա ու ձեռքերով փակել դեմքը:

Մենամարտից առաջ չափազանց ինքնավստահ էր եղել ու նշել, որ այդ դիմակայությունից հետո ամեն ինչ է փոխվելու իր համար: Ծառուկյանը գտնում էր, որ իր որակներով գերազանցում է մրցակցին ու նա իր մակարդակի չէ:

Իսկ պարտությունից հետո հետեւյալն է նշել. «Կատաղած եմ, պետք է ավելի լավ մենամարտեի, ինձ գիտեմ: Պետք է ուղղեմ սխալներս ու ավելի ուժեղ վերադառնամ: Ներողություն եմ խնդրում երկրպագուներիցս: Գտնում էի, որ հաղթել եմ 3 ռաունդում, չգիտեմ, թե մրցավարներն ինչպես են հաշվել»: