Ռոնալդուի, Մեսսիի ու Նեյմարի կենսագրություններից հետո հայ ֆուտբոլասեր ընթերցողների համար թարգմանվել է Աշխարհի ու Եվրոպայի չեմպիոն Յուրի Ջորկաեֆի «Snake. Ֆրանսիական ֆուտբոլի օձը» ինքնակենսագրականը:
Երեւանյան հորդառատ անձրեւը չի խանգարել ֆրանսիահայ հայտնի ֆուտբոլիստի երկրպագուներին ու լրագրողներին ներկա լինել գրքի հայերեն տարբերակի շնորհանդեսին:
Այն սկսել է մի քանի օր առաջ 86 տարեկան հասակում մահացած Ֆրանսիայի նախկին նախագահ Ժակ Շիրակի հիշատակը հարգելով: Ապա Հայաստանում Ֆրանսիայի դեսպան Ժոնաթան Լաքոտն է խոսել 2 հայտնի հայերի` Շառլ Ազնավուրի ու Ջորկաեֆի մասին՝ նրանց մեծ ներդրման ու կատարած աշխատանքի:
Լուսանկարը` Getty Images
«Միշտ ամաչել եմ ինձ ցուցադրել: Ինձ ճանաչելու համար բավական է հետեւել ֆուտբոլի դաշտում պահվածքիս: Խաղում ենք այնպես, ինչպես թելադրում է մեր էությունը: Սակայն զգում եմ, որ եկել է փորձս փոխանակելու ժամանակը, վկայելու, որ համառության ու աշխատասիրության շնորհիվ հնարավոր է երկնքից աստղեր իջեցնել»,-խոստովանում է Ջորկաեֆը:
Գրքում նա սպորտային լրագրող Առնո Ռամսեի հետ ներկայացնում է իր հետաքրքիր սպորտային ուղին, պատմում արմատների մասին, հիշատակում իր մեծ հայկական ընտանիքի պատմությունը, թե ինչպես է գեղեցիկ ժպիտը ժառանգել հայուհի մորից`Մարիից, ու թե իրականում որքան հմայիչ է Ջուլիա Ռոբերթսը:
Ջորկաեֆը հուզված գրել է նաեւ Հայաստան իր առաջին այցելության, Ռոման Բերեզովսկուն Երեւանուն 11-մետրանոցից խփած գոլի ու իր կարիերայից շատ այլ անմոռանալի դրվագների մասին:
Լուսանկարը` Getty Images
Ջորկաեֆի ինքնակենսագրականը ֆրանսերենից թարգմանել է Անահիտ Մեսրոպյանը, նախաբանը գրել է սպորտային լրագրող Ահարոն Բոյաջյանը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: