Երեւանի հանրապետական ստադիոնը Եվրոպայի Լիգայի որակավորման 3-րդ փուլի «Փյունիկ»-«Մաքքաբի» հանդիպումը դիմավորեց համարյա լիքը տրիբունաներով:
Երեւանյան թիմի նախորդ հանդիպման համեմատ մթնոլորտը ստադիոնում էլ ավելի թեժ էր: Անդրեյ Տալալաեւի սաները ոչ միայն հավասար պայքար ծավալեցին ավելի փորձառու մրցակցի հետ, այլ նաեւ կարող էին իրենք հաշվի մեջ առաջ անցնել:
Վաղուց այսպիսի պայքարող ու թիմային ոգի ցույց տվող հայկական ակումբ չէինք ունեցել: «Փյունիկն» ապացուցեց, որ անգամ կարճ ժամանակահատվածում նվիրված ու համառ աշխատանքը կարող է արդյունքի բերել:
«Մաքքաբիի» հետ հանդիպումը փյունիկցիները մի քանի վտանգավոր գրոհներով սկսեցին, որոնց ժամանակ երկու անգամ գլխի հարվածով կարող էր աչքի ընկնել Մոհամեդ Կոնատեն: Հեռահար ուժեղ հարված էլ կատարեց Ալիկ Առաքելյանը:
Լուսանկարը` FC Pyunik
«Փյունիկը» թիմային ջանքերի շնորհիվ կարողանում էր չեզոքացնել իսրայելական ակումբի ոչ պակաս սուր գրոհները, գնդակը նույնիսկ առաջին կեսի վերջնամասում դիպավ դարպասաձողին, ու արագ հակագրոհում էր: Սակայն առաջին կեսում հաշիվն այդպես էլ չբացվեց:
Երկրորդ կեսն էլ թիմերը սկսեցին երկուստեք գրոհներով, երեւանյան թիմը նպաստավոր դիրքում տուգանային վաստակեց, սակայն այն դիպուկ իրացնել չկարողացավ:
Լուսանկարը` FC Pyunik
«Մաքքաբին» էլ հետ չէր մնում մրցակցից, վտանգավոր պահերն իրար էին հաջորդում «Փյունիկի» դարպասի մոտ: Խաղադաշտում տիրող ակտիվ մրցակցությունն ավելի էին թեժացնում հայ երկրպագուները, սակայն դա «Մաքքաբիին» չէր խանգարում առաջ նետվել ու մեկը մյուսի հետեւից անհանգստացնել դարպասապահ Անդրիյա Դրագոեւիչին:
Այնուամենայնիվ «Փյունիկը» կարողացավ սեփական դարպասն անառիկ պահել, բայց նաեւ գոլ չխփել: Տնային հանդիպումն ավարտվեց 0:0 հաշվով:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: