ԱԱ. Կամային Գերմանիան, գոլառատ Բելգիան ու վստահ Մեքսիկան

Բելգիան Աշխարհի առաջնությունում իսկական գոլային հրավառություն է արել, Մեքսիկան 2-րդը հաղթանակը տարել, իսկ 2014-ի Աշխարհի չեմպիոն Գերմանիան միայն խաղավարտին է կարողացել հաղթանակ կորզել:

Անկասելի Բելգիան

Աշխարհի առաջնությունում շարունակում է տպավորիչ, գոլառատ ու գեղեցիկ խաղ ցույց տալ Բելգիայի ընտրանին:

Այս անգամ բելգիացիների գոլային տարափին չի դիմացել Թունիսի ընտրանին: Հանդիպումն ամենագոլառատն է եղել այս ԱԱ-ի ընթացքում ու ավարտվել է 5:2 հաշվով:

Լուսանկարը` Fifa.com

Բելգիացիներից դուբլի հեղինակներ են դարձել Ռոմելու Լուկակուն ու Էդեն Ազարը, գոլից մեկը նա խփել է 11-մետրանոցից, մեկ անգամ էլ աչքի է ընկել Միշի Բատշուային:

Բելգիան 7-րդ հավաքականն է, որ ԱԱ-ը սկսել է 2 խոշոր հաշվով հաղթանակներով:

Թունիսի կազմում գոլերը հեղինակել են Դիլան Բրոնն ու Վահբի Խազրին:

Բելգիան 6 միավորով G խմբի առաջատարն է, Անգլիայի ընտրանին դեռ մեկ հանդիպում պակաս է անցկացրել ու 3 միավոր ունի, այսօր այն խաղալու է Պանամայի հետ:

 Գերմանիայի փրկիչ Կրոսը

F խմբում էլ անպարտելի հանդիպումների շարքը շարունակում է Մեքսիկայի ընտրանին: Գերմանիային հաթելուց հետո, այն ուժեղ է եղել նաեւ Հարավային Կորեայի թիմից: Խաղն ավարտվել է 2:1 հաշվով:

Լուսանկարը` Fifa.com

26-րդ րոպեին 11-մետրանոցից հաշիվը բացել է Կառլոս Վելան, 40 րոպե անց աչքի է ընկել Խավիեր Հերնանդեսը: Հարավային Կորեան խաղավարտին Սոն Խին Մինի գոլի շնորհիվ միայն կարողացել է կրճատել հաշիվը:

Նույն խմբում Գերմանիան դժվարին ու կամային հաղթանակ է տարել Շվեդիայի նկատմամբ՝ 2:1: Հաշիվը բացել են շվեդները Օլա Տոյվոնենի գոլի շնորհիվ:

Լուսանկարը` Fifa.com

Մեծ դժվարությամբ 2014-ի չեմպիոնները Մարկո Ռոյսի օգնւթյամբ հավասարեցրել են հաշիվը: Ու չնայած Ժերոմ Բոատենգի հեռացումից հետո Գերմանիան 10 հոգով է մնացել, 90+5-րդ րոպեին Թոնի Կրոսը տուգանայինից գեղեցիկ գոլով հաղթանակ է պարգեւել Գերմանիային: Պարտության դեպքում Յոահիմ Լյովի սաները դուրս կմնային պայքարից:

Այժմ Մեքսիկան 6 միավոր ունի, իսկ Գերմանիան ու Շվեդիան՝ 3-ական: