Հունահռոմեականների հաջող ելույթը Կիեւում. Եւս երեք մեդալ

Կիեւում ավարտվել է ըմբշամարտի միջազգային մրցաշարը, որտեղ հանդես էր գալիս նաեւ Հայաստանի հունահռոմեական ոճի հավաքականը:

Մրցումային երկրորդ օրը եւս հաջող է դասավորվել հայ մարզիկների համար: Նրանցից երեքը դարձել է մեդալակիր:

Մինչեւ 66 կգ քաշային կարգում Կարեն Ասլանյանը հաջող ելույթներ է ունեցել, հաղթել է բոլոր մրցակիցներին ու դուրս եկել եզրափակիչ: Այստեղ նա ուժերն է չափել վրացի Գոգա Գոգիբերաշվիլու հետ ու պարտություն է կրել` նվաճելով արծաթե մեդալ:

Վարշամ Բորանյանը (75 կգ) եւ Մաքսիմ Մանուկյանը (85 կգ) նվաճել են բրոնզե մեդալներ: Նրանք երրորդ տեղի համար պայքարում ուժեղ են եղել համապատասխանաբար Յասավ Զեյնալովից (Ուկրաինա) եւ Սերգեյ Սեւերինից (Ուկրաինա):

Երեկ ոսկե մեդալակիր էր դարձել Սարգիս Քոչարյանը (80 կգ), արծաթե պարգեւի արժանացել էր Արթուր Շահինյանը (98 կգ), իսկ երրորդ տեղում ելույթներն ավարտել էին  Գեւորգ Ղարիբյանը (59 կգ) եւ Ռաֆիկ Մանուկյանը (80 կգ):