Հայ ծանրորդը երիտասարդական ԵԱ-ում երեկ նվաճել է փոքր մեդալ

Հայաստանի ծանրամարտի հավաքականն Իսրայելում ընթացող Եվրոպայի երիտասարդական առաջնությունում երեկ ունեցել է մեկ մասնակից:

Մինչեւ 23 տարեկանների մրցապայքարում ելույթ է ունեցել Ռազմիկ Օլթեցյանը (77 կգ): Հայ ծանրորդը բավարարվել է մեկ փոքր արծաթե մեդալով: Հրում վարժությունում նա 177 կգ-ով կանգնել է պատվոհարթակի երկրորդ աստիճանին:

Երկամարտում նա ցույց է տվել 314 կգ ու զբաղեցրել է 4-րդ հորիզոնականը:

Ավելի վաղ Հայաստանի հավաքականից ոսկե մեդալակիր էր դարձել Դավիթ Հովհաննիսյանը (77 կգ), որը հանդես է եկել մինչեւ 20 տարեկանների առաջնությունում:

Հայաստանի ընտրանուց Մ-20 տարեկաններում հանդես են գալու նաեւ Հակոբ Մկրտչյանը (85 կգ), Սամվել Գասպարյանը (94 կգ) եւ Սիմոն Մարտիրոսյանը (105 կգ):

Մ-23-ում Կարուշ Ղուկասյանը (94 կգ) եւ Մկրտիչ Մկրտչյանը (105 կգ):

Աղջիկների մրցաշարում ելույթ են ունենալու Սոնա Պողոսյանն (75 կգ) ու Արփինե Դալալյանը (+75 կգ):