Օրեր առաջ Ռումինիայում ավարտված Եվրոպայի առաջնությունում 6 հոգով մասնակցած Հայաստանի մարմնամարզության հավաքականին հաջողվել է 1 բրոնզե մեդալով վերադառնալ: Եվրոպայի առաջնություններում իր արդեն 5-րդ մեդալն է նվաճել Հարություն Մերդինյանը (նժույգթափեր):
Թիմի գլխավոր մարզիչ Հակոբ Սերոբյանն այսօր լրագրողների հետ հանդիպման ժամանակ գնահատական է տվել մարզիկների մանսակցությանը:
Գոհացնող ելույթները
Հավաքականի ընդհանուր մասնակցությունը բավարար եմ գնահատում, լավ հանդես եկան Մերդինյանն ու Արթուրն Դավթյանը:
Այս տարվա սկզբին Մերդինյանը դաստակի կոտրվածք ուներ, թեեւ այն ծուռ է կպել, սակայն նա կարողացավ կատարել իր վարժությունն ու մեդալ նվաճել: Հետագայում կավելացնի ու կփորձի մեդալի համար պայքարել նաեւ ԱԱ-ում:
Մրցակցությունը նժույգթափերում մեծ էր, մեդալակիրներին մի քանի տասնորդական միավորներ էին բաժանում:
Դավթյանը բազմամարտում կարողացավ անցնել եզրափակիչ ու բարելավել արդյունքը: Հենացատկում էլ նա իրեն լավ դրսեւորեց: Նոր կանոնակարգով պետք էր 2-րդ ցատկը բարդացնել, գիտեինք, որ մեդալի համար այս անգամ պայքարել չենք կարող:
Չստացված օղակները
Արթուր Թովմասյանը թեեւ երկրորդ տեղով անցավ եզրափակիչ, սակայն նրա ելույթը չստացվեց: Նա ձախողեց ցատկն ու արդյունքում 7-րդ տեղը զբաղեցրեց: Օղակների վրա վարժությունում նման վրիպում անել չի կարելի: Մարզիկն ինքն էլ դժվարանում է բացատրել կատարվածը:
Վահագն Դավթյանը 4-րդն էր, նա արեց ինչ կարող էր: Աշխարհի գավաթում բարդ վարժությամբ էր հանդես եկել, սակայն Եվրոպայի առաջնությունում մրցավարությունն ավելի խիստ է:
Երիտասարդները
Շատ դժգոհ եմ Վիգեն Խաչատրյանի ելույթից, նա չկարողացավ անել այն, ինչը սովորաբար մարզումների ժամանակ ստացվում էր: Ամենավատը պտտաձողի վրա հանդես եկավ, ձեռնակապերը պոկվել էին, թեեւ փոխեց, բայց ավելի լավ հանդես գալ չկարողացավ:
Խաչատրյանը պետք է հետեւություններ անի իր ելույթից, այլապես հավաքականում տեղ չի կարող ունենալ:
Արմեն Պետրոսյանն էլ իր հնարավորությունների չափով հանդես եկավ, եզրափակիչ անցնելը բարդ կլիներ նրա համար:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: