Մեկ կադրում. Յուրի Ջորկաեֆի երազանքի կատարումը

1998 ու 2000 թվականին Ֆրանսիայի ֆուտբոլի հավաքականի կազմում Աշխարհի ու Եվրոպայի չեմպիոններ դարձան երկու հայազգի խաղացողներ՝ Յուրի Ջորկաեֆն ու Ալեն Պողոսյանը:

Mediamax Sport-ի «Մեկ կադրի» հերոսն այսօր հիանալի ֆուտբոլային կարիերա կերտած ու իր նախնիների հայրենիքի՝ Հայաստանի հետ ջերմ կապեր պահպանող Ջորկաեֆն ու նրա թիմակիցներն են:

1998 թվականին «Ստադ դե Ֆրանսում» կայացավ Ֆուտբոլի Աշխարհի առաջնության եզրափակիչ հանդիպումը: Միմյանց դեմ մրցեցին 1994-ի Աշխարհի չեմպիոն Բրազիլիան ու 1-ին անգամ այս փուլ հասած Ֆրանսիան:

Տանտերերին օդ ու ջրի պես էր պետք հաղթանակը: Բրազիլիան մինչ այդ արդեն հասցրել էր 4 անգամ կրել Աշխարհի չեմպիոնի կոչումն ու աստղային կազմով էր ժամանել Եվրոպա:

Բայց Զինեդին Զիդանին ու թիմակիցներին հաջողվեց բրազիլացիների քթի տակից տանել ոսկե մեդալները:

Նախ եզրափակչի օրը վատացավ Ռոնալդոյի ինքնազգացողութունն ու նա մեծ հաշվով չկարողացավ օգնել իր թիմին: Փոխարենը փայլեց Զինեդին Զիդանը, որը գոլերի հեղինակ դարձավ 27-րդ ու առաջին խաղակեսի ավելացված րոպեներին:  Յուրի Ջորկաեֆն էլ 2-րդ գոլի փոխանցման հեղինակն էր:

Հենց այդ գոլից հետո էլ նա, Զիդանն ու Էմանուել Պետին տոնում են հաջողությունը: Իսկ 3-րդ հաղթական գնդակն իր հաշվին գրանցեց Պետին, որը 90+3-րդ րոպեին գեղեցիկ հարվածով գրավեց բրազիլացիների դարպասը:



Վերջապես իրականություն դարձավ ֆրանսիացիների ու փոքրիկ Յուրիի վաղեմի երազանքը:

1998-ի գարնանը՝ ԱԱ-ից մի քանի ամիս առաջ Յուրի Ջորկաեֆի մայրիկը նամակ էր ստացել որդու գրականության ուսուցչուհի Մոնիկ Դերյուայից: Նա պատահաբար գտել էր 10-ամյա  Յուրիի շարադրությունը «Երբ մեծանամ» վերնագրով ու որոշել այն ուղարկել:

«Երբ մեծանամ, ուզում եմ ֆուտբոլիստ դառնալ,- 1978-ին գրել է խաղացողը,- Երազում եմ «Լիվերպուլի» պես մեծ ակումբի գույները պաշտպանել, կենտրոնական հարձակվող լինել, շատ գոլեր խփել, հանդես գալ «Նյու Յորք Կոսմոսում» ու խաղալ Կրոյֆի, Պելեի եւ Բեքենբաուերի հետ: 20 տարեկանում էլ կուզեի Աշխարհի առաջնության մասնակցել ու եզրափակչի միակ գոլը խփել»:

Թեեւ ոչ ամբողջությամբ, բայց Ջորկաեֆի երազանքն այնուամենայնիվ կատարվեց, հետագայում նա Եվրոպայի չեմպիոն էլ դարձավ ու խաղաց մի շարք լավ ակումբներում, թեեւ Բեքենբաուերն ու Պելեն արդեն ավարտել էին իրենց կարիերան: