Արթուր Աբրահամ. ԱՄՆ-ում հաղթելը մեծ նվաճում կլինի ինձ համար

WBO վարկածով Աշխարհի չեմպիոն Արթուր Աբրահամը ապրիլի 9-ին Լաս Վեգասում պատրաստվում է իր գոտին պաշտպանել արդեն 5-րդ անգամ: Նրա մրցակիցն է լինելու պարտություն չունեցող 24-ամյա մեքսիկացի Ժիլբերտո Ռամիրեսը:

Թեեւ բռնցքամարտիկը շատ ծանր մարզումներ է անցկացնում ու ամբողջությամբ կենտրոնացած է առաջիկա մենամարտի վրա, ժամանակ է գտել ու պատասխանել է Mediamax Sport-ի հարցերին:

-Արթուր, 8 տարվա ընդմիջումից հետո կրկին մենամարտ ես անցկացնելու ԱՄՆ-ում: Ինչպե՞ս ես պատրաստ առաջիկա դիմակայությանն ու ի՞նչ ակնկալիքներ ունես դրանից:

-Ինչպես միշտ, հաղթական եմ տրամադրված եւ ապրիլի 9-ին Լաս Վեգասում կայանալիք մենամարտից միայն մեկ ակնկալիք ունեմ` հաղթանակ:

-ԱՄՆ-ում անցկացրած 3 մենամարտերից 2-ում պարտվել ես, հենց այնտեղ ես կրել քո առաջին պարտությունը: Արդյոք դա քեզ անհանգստանալու առիթ չի՞ տալիս:

- Բոլոր մենամարտերից առաջ էլ ես անհանգստություն եմ ունենում: Ամեն դեպքում, Ամերիկայում մենամարտելը երազանք է բռնցքամարտիկի համար: Այո, ԱՄՆ-ում պարտություններ եմ կրել, այնպես որ այնտեղ հաղթելը շատ մեծ նվաճում կլինի ինձ համար:

-Մրցակիցդ՝ Ժիլբերտո Ռամիրեսը, երիտասարդ է եւ ուժեղ: Նա դեռեւս ոչ մի պարտություն չի կրել: Ի՞նչ կասես Ռամիրեսի ոճի մասին ու ինչպե՞ս ես նրա դեմ հակախաղ գտնելու:

-Դիտել եմ նրա մենամարտերի տեսագրությունները, ակնհայտ է, որ ուժեղ մարզիկ է: Դե, բայց ես էլ պատրաստված եմ եւ հիմա միայն կարող եմ ասել, որ ապրիլի 9-ին ռինգում ուժեղ պայքար է ծավալվելու:

-Մենամարտի նախապատրաստական փուլերից մեկն անցկացրել ես Բուլղարիայում: Կպատմե՞ս ինչպես է այն անցել:

-Վերջին մարզումները Բուլղարիայի Բելմեկեն քաղաքում, ավելի ճիշտ` հարակից ձյունածածկ սարերում, մարտի 2-ին եմ անցկացրել: Այդ վայրն ընտրել է մարզիչս` Ուլի Վեգները: Շատ լավ լեռնային վայր է մարզումների համար, օդը մաքուր: Առաջին անգամ եմ այնտեղ մարզվել, հետագայում էլի կցանկանամ հավաք անցկացնել Բելմեկենի սարերում:  

-Մարզիչդ նշել էր, որ մենամարտին պատրաստվելու ընթացքում հատուկ սննդակարգի ես անցնելու, սնվելու ես հիմնականում ձկնատեսակներով: Որքանո՞վ է դա քեզ օգնում:

-Ճիշտ սննդակարգով սնվելը մարզումների մի մասն է կազմում, իսկ ծովամթերքի օգտակարության մասին վաղուց է հայտնի: Այն միանշանակ օգնում է:

Լուսանկարը` անձնական արխիվից