Եվրոպայի Լիգայի որակավորման 3-րդ փուլում Երեւանի «Փյունիկը» վաղը Երեւանում հյուրընկալելու է իսրայելական «Մաքքաբիին»:
Այսօր երեւանյան ակումբի գլխավոր մարզիչ Անդրեյ Տալալաեւը եւ կիսապաշտպան Պետրոս Ավետիսյանը նախախաղային մամուլի ասուլիսի ժամանակ խոսել են իրենց թիմի շանսերի ու մրցակցի մասին:
Տալալաեւ
Մեզ ավելի ու ավելի ուժեղ մրցակիցներ են բաժին հասնում, «Մաքքաբին» շատ համառ է: Եթե «Վարդառում» անհատապես ուժեղ խաղացողներն էին ավելի շատ ու թիմային պայքարը չբավականացրեց, որ մեզ հաղթեն, ապա «Տոբոլի» դեպքում անհատական որակներն էին քիչ: Հիմա խաղալու ենք հավաքված ու ուժեղ ֆուտբոլիստներ ունեցող մրցակցի հետ, որը կազմակերպված է ու ԵԼ-ում խաղալու մեծ փորձ ունի:
«Մաքքաբին» նաեւ լավ մարզիչ ունի, նա Հունաստանում է աշխատել ու հաջողությունների հասել, հիմա էլ նույնն Իսրայելում է անում: Նա յուրահատուկ մարզչական ձեռագիր ունի: Հաճելի կլինի մրցակցել, թեեւ տարբեր ռեսուրսներ ունենք, բայց ոչ մեկից չենք վախենում:
Ուրախալի է, որ երկրպագուները գալիս են մեր խաղերին, մյուս ուրախալի փաստը Էրիկ Վարդանյանի վերադարձն է թիմ: Այսօր լուրջ հավաք ենք ունեցել մանկապատանեկան ֆուտբոլի հետ կապված: Արմեն Գյուլբուդաղյանցն է մեզ հետ աշխատում, նա մանկապատանեկան ֆուտբոլում լավագույնն է ու Հայաստանի ամենալավ մարզիչներից մեկը: Միլանից մարզիչ ունենք, երկու հոգի էլ Ռուսաստանից ենք հրավիրել, որպեսզի արդյունքի հասնենք:
Հույս ունենք, որ «Փյունիկն» առաջատար է լինելու հայկական ֆուտբոլում բոլոր տարիքային խմբերում: Այսօր ԵԼ-ն է ուշադրության կենտրոնում, բայց առանց այդ հիմնական աշխատանքի ոչինչ չի լինի: Հույս ունենք, որ այդ աշխատանքն արդյունք կտա ու հաջորդ տարի էլ ավելի լավ հանդես կգանք:
Լուսանկարը` FC Pyunik
Ավետիսյան
Շատ ցավում եմ, որ կարիերայիս առաջին կարմիր քարտի պատճառով վաղը բացակայելու եմ: Բայց մենք պատրաստ ենք այս խաղերին, թիմում լավ մթնոլորտ է, այս հաղթանակն էլ ավելի է ամրապնդել թիմային ոգին: Այս փուլն անցնելը իրատեսական է: Խաղադաշտում անմնացորդ նվիրումով ենք գործելու:
Տալալաեւն իր հետ նոր փիլիսոփայություն, տակտիկա ու ոճ է բերել, շատ մեծ աշխատանք ենք կատարել նրա հետ: Արդյունքը, կարծում եմ, տեսնում եք` 3-րդ փուլում ենք ու կփորձենք հաղթահարել նաեւ այն:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: