Հայաստանի ֆուտբոլի ազգային հավաքականի գլխավոր մարզիչ Արթուր Պետրոսյանը պարզաբանել է, որ սեպտեմբերին Ռումինիայի ու Դանիայի ընտրանիների դեմ խաղին նախապատրաստվելու համար Հրայր Մկոյանին եւ Էդգար Մանուչարյանին թիմ չի հրավիրել վնասվածքների պատճառով:
Մեկնաբանելով երկար ընդմիջումից հետո Սարգիս Ադամյանին հրավիրելու փաստը՝ Պետրոսյանը ՀՖՖ-ի կայքին ասել է, որ ինքն անձամբ դիտել է վերջինիս մասնակցությամբ մի քանի հանդիպումներ:
«Քանի որ Ադամյանը «Յան Ռեգենսբուրգի» կազմում հանդես է գալիս Գերմանիայի երկրորդ Բունդեսլիգայում ու խաղային մշտական պրակտիկա ունի, որոշում է կայացվել նրան հրավիրել հավաքական: Մարզչական շտաբը հետեւում է նաեւ Գեղամ Ղադիմյանի ելույթներին, նրան համարում է հավաքականի թեկնածու, ուղղակի այս անգամ նպատակահարմար գտանք հրավիրել այլ ֆուտբոլիստների»,- ասել է մարզիչը:
Պետրոսյանն արդեն հրապարակել է արտերկրում հանդես եկող ֆուտբոլիստների անունները, իսկ Հայաստանի առաջնության մասնակցիներին կներկայացնի ավելի ուշ:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: