Հայաստանի ընտրանու երեւանյան հավաքին ոչ բոլոր ֆուտբոլիստներն են մասնակցելու

Հայաստանի ազգային հավաքականի գլխավոր մարզիչ Բեռնար Շալանդը հրապարակել է թիմի մարզումային ծրագիրը:

Հավաքականը նախապատրաստվելու է սեպտեմբերի 3-ին եւ 7-ին կայանալիք Լատվիայի ու Դանիայի ընտրանիների հետ հանդիպումներին:

Օգոստոսի 31-ին Հայաստանի ազգային հավաքականը հանգրվանելու է ՀՖՖ տեխնիկական կենտրոնում եւ երեկոյան մարզում անցկացնելու:

Երեւանյան հավաքին մասնակցելու են Գեւորգ Կասպարովը, Արսեն Բեգլարյանը, Հրայր Մկոյանը, Ռոբերտ Արզումանյանը, Վարազդատ Հարոյանը, Տարոն Ոսկանյանը, Կառլեն Մկրտչյանը, Մարկոս Պիզելին ու Կամո Հովհաննիսյանը: Հավաքական հրավիրված մյուս ֆուտբոլիստները թիմին միանալու են Լատվիայում:

Սեպտեմբերի 1-ին ժամը 10:00-ին Հայաստանի ֆուտբոլային պատվիրակությունը ուղիղ չարտերային չվերթով մեկնելու է Ռիգա, որտեղ նույն օրը ժամը 18:00-ին մարզում է անցկացնելու: Սեպտեմբերի 2-ին ժամը 18:00-ին հավաքականն անցկացնելու է նախախաղային մարզում «Սկոնտո» մարզադաշտում, որի առաջին 15 րոպեները «բաց» են լինելու:

Սեպտեմբերի 3-ին ժամը 20:45-ին «Սկոնտո» մարզադաշտում կայանալու է Լատվիա-Հայաստան ընկերական հանդիպումը: Սեպտեմբերի 4-ին երեկոյան թիմը եւս մեկ մարզում է ունենալու, իսկ սեպտեմբերի 5-ին առավոտյան ուղիղ չարտերային չվերթով մեկնելու է Կոպենհագեն, որտեղ 2 մարզում է անցկացնելու: 

ԵՎՐՈ-2016-ի Դանիա-Հայաստան ընտրական հանդիպումը կայանալու է «Պարկեն» մարզադաշտում սեպտեմբերի 7-ին ժամը 20:00-ին: