Օլիմպիական Ռիոյում հաղթելուց հետո 1 տարի ու 5 օր անց Արթուր Ալեքսանյանը կրկին ոսկով նշանավորեց իր ելույթը:
2014 թվականի Աշխարհի առաջնությունից հետո ոչ մի ըմբիշի այդպես էլ չի հաջողվում նրա քաշային կարգում առավելությունն իր ձեռքը վերցնել:
2014-ին Տաշքենդում, 2015-ին՝ Լաս Վեգասում ու 2017-ին Փարիզում ոսկի մեդալներ միայն Ալեքսանյանն է նվաճում:
Mediamax Sport-ը հետեւել է նրա բոլոր չեմպիոնական ելույթներին ու ներկայացնում է ալեքսանյանական հաջողությունների ուղին:
Լուսանկարը` unitedworldwrestling.org
Օլիմպիական խաղերում հաղթելուց հետո Արթուր Ալեքսանյանի համար նոր ժամանակներ սկսվեցին: Սպորտային բոլոր տիտղոսներին արժանացած մարզիկը պետք է իր կարիերայում այլ մեկնարկ ազդարարեր: Նա մեկ անգամ չէ, որ Եվրոպայի չեմպիոն էր եղել ու հաղթել Աշխարհի առաջնությունում: Բայց դա եղել էր նախաօլիմպիական շրջանում:
Ռիո-2016-ից հետո Ալեքսանյանը երկար ընդմիջում ունեցավ, լիարժեք հանգստացավ, ճանապարհորդեց, վայելեց երկրպագուների սերն ու ճանաչումը՝ այդ ընթացքում բաց թողնելով մի քանի մրցաշարեր:
Սակայն գորգ վերադառնալու ժամանակն էր, անհամբերությամբ սպասում էր ոչ միայն ըմբիշը, այլ նաեւ նրա տաղանդի սիրահարները:
Լուսանկարը` unitedworldwrestling.org
2017-ը նրա համար այդքան էլ հեշտ չստացվեց: Եվրոպայի առաջնությունում 2016-ի ամենակարեւոր ոսկու նվաճողն ընդամենը 3-րդն էր: Գուցե, շատ մարզիկների համար դա երազանքի մեդալ կհամարվեր, սակայն ոչ Ալեքսանյանի:
Հնարքների մեծ զինանոց ու անկրկնելի տեխնիկայի ունեցող, գեղեցիկ ըմբշամարտի կողմնակից ըմբիշի համար անսովոր եւ ձանձրալի էր գոտեմարտել նոր կանոններով: Մենք չտեսանք այն ոգեւորությունն ու կայծը, որ սովորաբար լինում է, երբ գորգում հայտնվում է Ալեքսանյանը:
Դրան հաջորդեց Թբիլիսիում կայացած Աշխարհի Գավաթը, որի եզրափակիչը հայ-վրացական ընդհարումներով ու հայ ըմբիշի որակազրկմամբ ավարտվեց:
Սակայն Աշխարհի առաջնությանը 2 ամիս ժամանակ էր մնում ու պետք էր ցույց տալ, թե ինչպես են վերադառնում չեմպիոնները: Նախապատրաստական հավաքներից մեկի ժամանակ Ալեքսանյանը մասնակցեց իրեն նվիրված նամականիշի մարման արարողությանը:
Լուսանկարը` unitedworldwrestling.org
Վերջապես եկավ եւ Փարիզի Աշխարհի առաջնության ժամանակը: Հիմա սիրո ու Էյֆելյան աշտարակի, օծանելիքի ու նորաձեւության քաղաքը մեզ համար նաեւ ըմբշամարտի բույրով է հիշվելու:
Այն «օծանելիքի», որը տարիներ շարունակ իր հաղթական «լաբորատորիայում» ստեղծում է Ալեքսանյանը: Դրա մեջ խտացված են տարբեր ու առաջին հայացքից անհամատեղելի թվացող բույրերը՝ հաղթանակների ոգեւորությունը, եզակի, բայց եւ դառը պարտությունները, վնասվածքների ցավը, երկարատեւ ու հոգնեցնող մարզումների քրտինքը:
Նրանք հավաքված են բոլոր այն քաղաքներից, որտեղ ելույթ է ունեցել ու ոսկիներ կուտակել ըմբիշը՝ Բելգրադից, Թբիլիսից, Վանտայից, Տաշքենդից, Լաս Վեգասից Ռիոյից ու Երեւանից:
Լուսանկարը` unitedworldwrestling.org
Այդ հսկայական քաղաքների շարքում սակայն առանձնակի տեղ ունի համեստ ու փոքրիկ Գյումրին, որտեղ գտնվում է Ալեքսանյանի անվան մարզադպրոցը:
Սակայն սարսափելի պայմաններում գտնող դպրոցում միեւնույն է հավատում են հրաշքների, որ մի օր իրենց համաքաղաքացին կրկին հաղթելու է ամենամեծ գորգերում ու այդ հաղթական ալիքը կրկին տարածվելու է ողջ Հայաստանում՝ ոգեւորություն առաջացնելով անգամ ամենահեռավոր անկյուններում:
Նրանք իրենց աչքերով են տեսնելու, թե ինչպես են աշխատում, չհանձնվում ու դժվարությունները հաղթահարում ֆանտաստիկ մարզիկները, որոնք գորգում այնպես են կախարդում, ինչպես հմուտ վարպետներն են ստեղծում արվեստի մնայուն գլուխգործոցներ:
Հասմիկ Բաբայան
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: