Ավարտվեց Չեմպիոնների լիգայի 25-րդ խաղարկությունը: Մադրիդի «Ռեալը» դարձավ մրցաշարի պատմության մեջ առաջին ակումբը, որը կարողացավ պաշտպանել չեմպիոնական տիտղոսը: Բացի այդ, գրանցվեցին մի շարք կարեւորագույն իրադարձություններ: Mediamax Sport-ն ամփոփել է Չեմպիոնների լիգայի լավագույն մրցաշրջանը:
Հիասթափություններ
«Ռոմա»
Լուսանկարը` corriereobjects.it
Իտալական ակումբն անսպասելիորեն չկարողացավ որակավորման փլեյ-օֆֆ փուլում հաղթահարել «Պորտուի» արգելքը: Երկխաղյա դիմակայության արդյունքում «Ռոման» ընդհանուր 1:4 հաշվով պարտվեց «Պորտուին»: Լուչիանո Սպալետիի արդեն նախկին թիմն այդ ժամանակ գտնվում էր լավ մարզավիճակում, սակայն կարգապահության անսպասելի բացակայությունը ծանր հետեւանքներ ունեցավ: «Ռոմայի» ֆուտբոլիստները 2 խաղում 3 անիմաստ կարմիր քարտ ստացան: Այսպիսի անլուրջ մոտեցումն էլ իր տրամաբանական ավարտն ունեցավ՝ «Ռոման» չհայտնվեց ՉԼ-ի խմբային փուլում:
«Արսենալ»
Լուսանկարը` https://www.thesun.co.uk/
Կարելի է ասել, որ այս անգամ «զինագործների» բախտը պարզապես չբերեց: Նրանք խմբում զբաղեցրին առաջին տեղը, բայց միեւնույնն է, 1/8-ում, որպես մրցակից, նրանց բաժին հասավ Մյունխենի «Բավարիան»: Բայց երկու անգամ նույն 1:5 հաշվով պարտություն կրելն ու անփառունակ խաղ ցուցադրելը ստիպում է «Արսենալի»` ՉԼ-ում անցկացրած մրցաշրջանը համարել ձախողված: Եվ այստեղ հարցը մակարդակների տարբերությունը չէ: Արսեն Վենգերի մի շարք անհասկանալի որոշումներն ու բազում վնասվածքները դարձան «Արսենալի» ձախողման հիմնական պատճառը: Այնուամենայնիվ, Վենգերը չի հեռանում Լոնդոնից եւ գուցե գալիք մրցաշրջանում կարողանա քավել մեղքերը:
«Մանչեսթեր Սիթի»
Լուսանկարը` http://www.mcfcwatch.com
Պեպ Գվարդիոլայի թիմը միանշանակ ավելիին էր ընդունակ՝ հաշվի առնելով թիմում հավաքված թոփ մակարդակի ֆուտբոլիստներին: Բայց «Մոնակոյի» նման գերհարձակողական թիմի խայծը կուլ տալն առնվազն անխելքություն էր: Պարզապես Գվարդիոլան ինչպես հարկն է չէր պատրաստել թիմին՝ թերագնահատելով մրցակցին: Արդյունքում՝ «Մանչեսթեր Սիթին» ոչ միայն ձախողեց Չեմպիոնների լիգան, այլեւ մնացած բոլոր մրցաշարերը: Կարծում եմ՝ սա դաս կլինի Գվարդիոլայի համար:
«ՊՍԺ» եւ «Բարսելոնա»
Լուսանկարը` https://cdn.tribuna.com
Այս երկու թիմերի դիմակայության մասին շատ է խոսվել: «ՊՍԺ»-ն գերազանց անցկացրեց առաջին հանդիպումը, սակայն ամոթալի կերպով պարտվեց ընդհանուր դիմակայությունում: Այո, պարտվեց «ՊՍԺ»-ն: «Բարսելոնան» որքան էլ որ ճնշում գործադրեց, ֆանտաստիկ կամքի ուշ ցուցադրեց, միեւնույնն է, այս պարտության միակ մեղավորն Ունայ Էմերին է: Թոփ ակումբի գլխավոր մարզիչը չի կարող այդչափ վախկոտ գտնվել:
«Բարսելոնան» ձախողեց «ՊՍԺ»-ի հետ առաջին խաղը, բայց պատասխան խաղում գրանցած ֆանտաստիկ տրիումֆը փոխհատուցեց այդ սխալները: Իսկ ահա «Յուվենթուսի» դեմ երկու հանդիպումներում կատալոնացիները գրեթե ոչնչով աչքի չընկան: Եթե նույնիսկ կային պահեր, միեւնույնն է, դրանք չհաջողվեց գոլի վերածել:
Անակնկալներ
«Մոնակո»
Լուսանկարը` https://www.thestar.com
Անկասկած, Չեմպիոնների լիգայի 2016-2017 թթ. մրցաշրջանի գլխավոր անակնկալը ֆրանսիական «Մոնակոն» էր: Թիմ, որը մրցաշարի որակավորման փլեյ-օֆֆ փուլից սկսած հիացնում էր իր խաղով: Լեոնարդո Ժարդիմի համեստ թիմը խմբային փուլում զբաղեցրեց առաջին հորիզոնականը, 1/8-ում հաղթահարեց «Մանչեսթեր Սիթիի», իսկ քառորդ եզրափակչում՝ Դորտմունդի «Բորուսիայի» արգելքը: Անսպասելի, բայց միեւնույն ժամանակ արդարացի կերպով հայտնվելով կիսաեզրափակչում, ֆրանսիական ակումբը պայքարը զիջեց Թուրինի «Յուվենթուսին»: Մրցաշարի գլխավոր հայտնություն դարձավ «մոնեգասկների» երիտասարդ հարձակվող Կիլիան Մբապեն: «Մոնակոն» հիացրեց ամբողջ ֆուտբոլային աշխարհին՝ ցուցադրած վառ եւ գերհարձակողական ֆուտբոլով:
«Լեսթեր Սիթի»
Լուսանկարը` https://cdn.tribuna.com
Մրցաշարի մեկնարկից առաջ շատերը կատակում էին՝ «Լեսթերը» կարող է դառնալ Չեմպիոնների լիգայի հաղթող: Գավաթակիր չդարձավ, բայց հասավ մինչեւ 1/4 եզրափակիչ, որտեղ պարտվեց Մադրիդի «Աթլետիկոյին»: Անգամ մարզչական փոփոխությունը չթուլացրեց «աղվեսներին»: Իսկ նման համեստ թիմի համար Չեմպիոնների լիգայի քառորդ եզրափակչում հայտնվելը յուրահատուկ նվաճում է:
Կրկնակի գավաթակիրը
Եվ վերջում, իհարկե պետք է խոսել չեմպիոնների մասին: Մադրիդի «Ռեալն» այս տարի հասավ մի նվաճման, որը վերջին 24 տարիներին անհասանելի բարձունք էր նույնիսկ լավագույնների համար: Իսկ «Ռեալը» դարձավ լավագույններից լավագույնը: Եվ պետք չէ նսեմացնել մադրիդցիների հաղթանակը՝ մրցավարներին մեղադրելով: Ինչպես ասում են՝ հաղթողներին չեն դատում: Ճիշտ է՝ այն, ինչ տեղի ունեցավ Մյունխենի «Բավարիայի» դեմ պատասխան խաղում, իրոք խայտառակություն էր, բայց, եթե լինենք անկեղծ, ապա «Ռեալի» ֆուտբոլիստներն այդտեղ մեղավոր չեն: Նրանք չպետք է պատասխան տան մրցավարական սխալների համար: Այն, որ Զինեդին Զիդանի թիմը գերազանց խաղ ցուցադրեց մրցաշարի ամբողջ ընթացքում, անհերքելի փաստ է, իսկ Զիդանի աշխատանքն արժանի է գովասանքի:
Միհրան Ալեքսանյան
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: