1993 թվականից Ֆրանչեսկո Տոտտին «Ռոմայի» ընտանիքի անդամ է: Ողջ ֆուտբոլային կարերան ակումբում անցկացրած իտալացին երեկ հրաժեշտ տվեց երկրպագուներին:
786 անգամ Տոտտին հագել է հռոմեացիների մարզաշապիկը՝ դառնալով 307 գոլի հեղինակ:
Նրան անչափ շատ են սիրում «Ռոմայի» երկրպագուները: Իտալացիները, եւ ոչ միայն, խոստովանում են, որ Տոտտին նման չէ բոլորին, այդ պատճառով էլ նրանով հիանում են բոլորը:
ՈւԵՖԱ-ն ներկայացրել է հետաքրքիր փաստեր, թե ինչու է նա ընդունվում բոլոր երկրպագուների կողմից:
Նվիրվածություն
Լուսանկարը` imortaisdofutebol.com
«Ռոմայի» կազմում Տոտտին նորամուտը նշել է 1993 թվականին ու այդ օրվանից երբեք չի լքել հարազատ ակումբը:
«Ռոման» իմ ամեն ինչն է: Սա այն է, ինչի մասին կարող է երազել ամեն մարդ՝ կիրք, սեր եւ ուրախություն: Ես միշտ պաշտել եմ թիմի գույները ու հավիտյան հավատարիմ եմ լինելու»,- խոստովանել է ֆուտբոլիստը:
Անմնացորդ այս սերը նրան դարձրեց «Ռոմայի» լեգենդ: Ակումբում նրա տիտղոսները շատ չեն՝ չեմպիոնական մեկ տիտղոս ու Իտալիայի երկու գավաթ, բայց իր հեղինակությունն ավելի բարձր է:
Բարեգործ ու հումորի վարպետ
Լուսանկարը` uncuoreromanista.it
2003 թվականից Տոտտին ՅՈւՆԻՍԵՖ-ի բարի կամքի դեսպան է եւ այդ կոչմանը շատ լուրջ է վերաբերվում: Նա սեփական անեկտոդների գիրք է հրապարակել, որը մեծ պահանջարկ ունի, հանդես է եկել որպես երգիչ, թենիսի բարեգործական հանդիպում է անցկացրել Նովակ Ջոկովիչի հետ: Ոչ միայն ֆուտբոլիստ է, այլ նաեւ հայտնի հասարակական գործիչ:
Նույնիսկ ամռանը Լեո Մեսսից ստացած մարզաշապիկը նա վաճառքի է հանել ու գումարը տրամադրել բարեգործության:
Նա նաեւ եսասեր չէ: Երբ երկրպագուները թիմի ղեկավարությունից պահանջում էին, որ 10 համարի շապիկը հավերժ մնա Տոտտիինը, հայտարարեց. «10 համարի շապիկը կարծես իմ երկրորդ մաշկը լինի: Բայց յուրաքանչյուրը պետք է հնարավորություն ունենա կրելու այն ու հասնելի հաջողությունների»:
Բարձր կարգի պահպանում
Լուսանկարը` AC Roma
«Ես 38 տարեկան եմ, բայց ամենեւին չեմ զգում դա»,- 2014-ին ասել էր Տոտտին, երբ Չեմպիոնների Լիգայում դարձել էր գոլ խփած ամենատարեց ֆուտբոլիստը: Իսկ 40-ամյակը լրանալուց հետո նա Եվրոպայի Լիգայում երեք գոլային փոխանցման հեղինակ էր դարձել:
Երբ 2001 թվականին Դանիելե Դե Ռոսսին առաջին խաղն անցկացրեց «Ռոմայի» կազմում, երկրպագուները նրան անվանեցին Ապագայի Ավագ: Ոչ ոք չէր կասկածում, որ Տոտտին ավագի թեւկապը կհանձնի նրան:
«Երեխա ժամանակ ես հիացմունքով էի նայում նրա խաղերը,- 2015-ին ասել է Դե Ռոսսին,- 38 տարեկանում շարունակում է հրաշքներ գործել: Կարծում եմ, որ ես հավերժ կմնամ Ապագայի Ավագը, քանի որ Տոտտին «Ռոմայի» հավերժ ավագն է»:
Դերասանական տաղանդ
Լուսանկարը` The Score
Տոտտին երբեք չի հոգնել նշել խփած գոլերը: Նրա դերասանական տաղանդը հատկապես բացվում է այն ժամանակ, երբ գրավում է «Լացիոյի»՝ «Ռոմայի» ամենակատաղի մրցակիցի դարպասը:
2012-ին գոլից հետո նա նստեց օպերատորի տեղում ու նկարահանեց, թե ինչպես են ուրախանում ամենակատիվ երկրպագուները: Երեք տարի անց «Լացիոյի» դեմ իր 40-րդ հանդիպումն էր անցկացնում: Հրաշալի գոլից ու հռոմեական դերբիում լավագույն ռմբարկու դառնալուց հետո նա սելֆի արեց երկրպագուների հետ. «Սովորաբար նման բան չեմ անում, բայց հրաշալի ռեկորդ սահմանեցի ու ցանկացա այդ օրը հավերժ հիշել: Գոլը ֆանտաստիկ ստացվեց, իսկ լուսանկարը՝ ոչ այդքան»,- գրել էր նա:
Լուսանկարը` Globoesporte
Իսկ 2011-ին, երբ «Բարիի» դեմ խաղում խփեց իր թիմի հաղթական գոլը եւ Ա Սերիայում առաջ անցավ Ռոբերտո Բաջիոյից, հանեց շապիկը, որպեսզի ցույց տա «Հռոմի կայսրը կենդանի է» գրությունը:
Տոտտիի ֆուտբոլային կարիերան ավարտվեց, սակայն նրա ժառանգությունը կապրի հավերժ:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: