Տարեսկզբին անգլիական «Լեսթեր Սիթին», մեղմ ասած, գտնվում էր անմխիթար վիճակում: Պարտությունների շարք, անկայուն խաղ, խառնված դեմքեր եւ դեպքեր:
Պետք չէր լինել ֆուտբոլային փորձագետ հասկանալու համար, որ ակումբի պատմության լավագույն մարզիչ Կլաուդիո Ռանիերին կորցրել էր երբեմնի «կախարդական փայտիկը», որով ինչպես ինքն էր նշում, կառավարում էր իր թիմը: Այս ամենի տրամաբանական ավարտն էլ եղավ իտալացի մասնագետի հեռացումը:
Սակայն, այն ինչ եղավ հետո, զարմացրեց շատերին: Mediamax Sport-ը ներկայացնում է «Լեսթեր» ֆուտբոլային ակումբում տիրող իրավիճակն ու նորանշանակ գլխավոր մարզիչ Քրեյգ Շեքսպիրին, ով ստանձնել է աղվեսներին Պրեմիեր Լիգայում պահելու առաքելությունը:
Լուսանկարը` http://www.telegraph.co.uk
Ով է նա
Քրեյգ Շեքսպիրը ծնվել է 1963 թ. Բիրմինգեմ քաղաքում: Ֆուտբոլիստի կարիերայի ընթացքում հասցրել է խաղալ «Ուոլսոլ», «Շեֆիլդ Ուենսդեյ» եւ «Վեսթ Բրոմվիչ» ակումբներում՝ ընդհանուր առմամբ անցկացնելով ավելի քան 500 հանդիպում:
Մարզչական կարիերան սկսել է 2006 թվականին: Կարճ ժամանակահատվածով գլխավորելով «Վեստ Բրոմվիչը»՝ Շեքսպիրը տեղափոխվում է «Լեսթեր» եւ մինչ 2017 թ. փետրվարի 27-ն աշխատում որպես գլխավոր մարզչի օգնական (2010-11 թթ. անցկացրել է «Հալլ Սիթիում» ):
Կլաուդիո Ռանիերիի հեռանալուց հետո, ակումբի ղեկավարությունը որոշում է կայացնում մինչեւ ընթացիկ մրցաշրջանի ավարտը թիմի ղեկը հանձնել Քրեյգ Շեքսպիրին: Դատելով «Լեսթերի» ցուցադրած արդյունքներից՝ չափազանց երկար եւ դժվար արտասանվող ազգանուն ունեցող սեփականատերը՝ Վիշայ Շրիվադանապրաբհան, ճիշտ որոշում է կայացրել:
Ինչ է տվել Շեքսպիրը «Լեսթերին»
Զուտ ֆուտբոլային տեսանկյունից ոչինչ, իսկ ահա հոգեբանորեն Շեքսպիրը կարողացել է ֆուտբոլիստներին հանգստություն եւ զգոնություն հաղորդել: Այլեւս չկան խուճապահար որոշումներ եւ սխալվելու վախից դրդված անիմաստ գործողություններ:
Բնականաբար Շեքսպիրի վրա այդքան էլ մեծ չէ ճնշումը: Եթե նույնիսկ նրան չհաջողվի թիմին պահել անգլիական ֆուտբոլի էլիտայում՝ աղետ չի լինի: Սակայն հանդուգն Շեքսպիրն իր հանրահայտ անվանակցին հարիր վստահությամբ առաջնորդում է «Լեսթերին» դեպի մրցաշարային աղյուսակի վերնամաս, որքան հնարավոր է շատ հեռանալով վտանգավոր գոտուց:
Խաղային սխեմա եւ տակտիկա
Լուսանկարը` amazonaws.com
Պարադոքսալ է, բայց Շեքսպիրը ոչ թե փոխեց թիմի խաղային սխեման, այլ վերադարձրեց չեմպիոնական տարում ակտուալ 4-4-2-ը: Ընթացիկ մրցաշրջանում Ռանիերին փորձում էր ամեն ինչ, բացի վերոհիշյալ սխեմայից: Հենց այդտեղից էլ ֆուտբոլիստների մոտ դժգոհություններ առաջացան: Իտալացու կարծիքով՝ 4-4-2 սխեման իրեն սպառել էր եւ մրցակիցներն արդեն կարողանում էին հակախաղ գտնել դրան:
Սակայն ինչպես ցույց է տալիս ժամանակը Ռանիերին սխալվում էր:
Շեքսպիրը, որպես գլխավոր մարզիչ առաջին հերթին փորձեց հաշվի առնել ֆուտբոլիստների ցանկությունները: Եթե Վարդին ուզում է վազել, թող վազի: Եթե Մահրեզն ուզում է ավելի շատ դրիբլինգի դիմել, թող լինի այդպես: Այս քայլով Շեքսպիրը կարողացավ բալանսի բերել թիմի խաղը, որի շնորհիվ «Լեսթերի» ֆուտբոլիստները վերակենդանացան:
Թվեր, փաստեր
Լուսանկարը` amazonaws.com
Քրեյգ Շեքսպիրի «Լեսթերի» գլխավոր մարզիչ նշանակվելու պահին թիմն անցկացրել էր 25 հանդիպում՝ 5 հաղթանակ, 4 ոչ-ոքի, 14 պարտություն, 24/43 խփած եւ բաց թողած գոլեր:
Շեքսպիրի նորամուտի խաղում «Լեսթերը» սեփական հարկի տակ 3:1 հաշվով հաղթում է «Լիվերպուլին» եւ սկիզբ դնում 6 խաղից բաղկացած հաղթական շարքին, որից 5-ը ԱՊԼ-ում:
Շեքսպիրը դարձավ առաջին անգլիացի մարզիչն, ով ԱՊԼ-ում հաղթում է նորամուտի 4 անընդմեջ խաղերում:
Նա դարձավ երրորդ մարզիչն, ով ԱՊԼ-ում հաղթում է նորամուտի 5 խաղերում անընդմեջ: Նրանից առաջ նման արդյունքի էին հասել Կառլո Անչելոտին «Չելսիում» եւ Պեպ Գվարդիոլան՝ «Մանչեսթեր Սիթիում»:
Շեքսպիրը դարձավ երրորդ անգլիացի մարզիչն, ով ղեկավարում է թիմը ՉԼ-ի փլեյ-օֆֆ փուլում: Նրանից առաջ նման արդյունքի հասել էին Հարի Ռեդնափը «Տոտենհեմի» եւ Բոբի Ռոբսոնը՝ «Նյուքասլի» հետ:
Լուսանկարը` amazonaws.com
Եզրափակելով կարելի է նշել, որ Ուիլյամ Շեքսպիրի հայտնի ստեղծագործությունից թեւավոր խոսք դարձած արտահայտությունը. «Լինել թե չլինել», «Լեսթերում» ակտուալ չէ: Քրեյգ Շեքսպիրի մոտ այն հստակ է. «Լինել Անգլիայի Պրեմիեր լիգայում» եւ ինչու ոչ, նաեւ Չեմպիոնների լիգայում:
Միհրան Ալեքսանյան
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: